अक्टोबर ७ को त्रासदी र इजरायली सीमावर्ती बासिन्दा: अझै निको नभएको मानसिक चोट र गाजाप्रतिको त्रास

काठमाडौँ, असोज २१ गते । गाजामा भएको ठूलो विनाशलाई विश्वका धेरै मानिसले मानवीय त्रासदीका रूपमा हेर्दै आएका छन्। तर, सन् २०२३ अक्टोबर ७ मा हमास नेतृत्वको आक्रमणबाट प्रत्यक्ष प्रभावित धेरै इजरायलीहरूका लागि गाजा अझै पनि सुरक्षा खतरा, मानसिक पीडा र डरको प्रतीक बनेको छ। गाजा नजिकैको इजरायली सहर सेडेरोटबाट दूरबिनमार्फत बेइत हानुनका ध्वस्त भवन र इजरायली सेनाको गतिविधि नियाल्ने मानिसहरू अझै भेटिन्छन्।

सन् २०२३ अक्टोबर ७ मा हमासको आक्रमणमा परी करिब १,२०० जनाको मृत्यु भएको थियो भने २५१ जनालाई बन्धक बनाइएको थियो। त्यस घटनापछि सुरु भएको विनाशकारी युद्ध र पछि भएको युद्धविरामका बाबजुद सीमावर्ती इजरायली समुदायमा त्यस दिनको गहिरो मानसिक असर कायमै छ। गाजासँग समानान्तर राजमार्गमा मारिएकाहरूको सम्झनामा स्मारकहरू बनाइएका छन् भने गोली लागेका क्षतिग्रस्त गाडीहरू सुरक्षित राखिएका छन्।

आक्रमणमा ज्यान गुमाएका महिला सैनिक पर्यवेक्षकहरूको तस्बिर पनि विभिन्न स्थानमा राखिएका छन्, जसले हमलाबारे पहिले नै चेतावनी दिए पनि बेवास्ता गरिएको बताइएको छ। सेडेरोटकी बासिन्दा डेगानित बार हेलका अनुसार आक्रमणको प्रभाव यति गहिरो छ कि जलेको मासुको गन्धले समेत उहाँलाई त्यस दिनको ‘नरकको गन्ध’ र घटनाको सम्झना दिलाउने गर्छ।

एपीको स्थलगत रिपोर्टअनुसार, युद्धको भयावहतालाई लिएर इजरायली र प्यालेस्टिनी दुवै पक्षले फरक-फरक पीडा र अनुभव बोकेका छन्। गाजामा ठुलो मानवीय सङ्कट र विनाश छाएको छ भने अर्कोतर्फ इजरायली सीमावर्ती समुदायमा गाजालाई छिमेकी क्षेत्रभन्दा बढी सम्भावित खतराको रूपमा हेर्ने भावना र अविश्वास अझै कायम छ।