चाडपर्व नजिकिएसँगै काठमाडौँ उपत्यका छाड्नेको घुइँचो: पछिल्लो २४ घण्टामा ४९ हजारभन्दा बढी यात्रु बाहिरिए

काठमाडौँ, असोज २२ गते । नजिकिँदो चाडपर्वसँगै काठमाडौँ उपत्यकाबाट बाहिरिने यात्रु तथा सवारी साधनको सङ्ख्यामा उल्लेख्य वृद्धि भएको छ। काठमाडौँ उपत्यका ट्राफिक प्रहरी कार्यालयको पछिल्लो तथ्याङ्क अनुसार विगत २४ घण्टाको अवधिमा मात्रै उपत्यकाका विभिन्न नाकाबाट ४९ हजार २४६ जना यात्रु बाहिरिएका छन्।

काठमाडौँ उपत्यका ट्राफिक प्रहरी कार्यालयका सूचना अधिकारी प्रहरी उपरीक्षक नरेश राज सुवेदीका अनुसार असोज २१ गते ७ हजार ६३१ वटा सवारी साधन उपत्यकाबाट बाहिरिएका थिए। यसैगरी असोज २० गते ७ हजार ७५८ सवारी साधनमार्फत ४९ हजार ४७६ यात्रु तथा असोज १९ गते ८ हजार ९५४ सवारी साधनमार्फत ४७ हजार ५२६ जना यात्रुले उपत्यका छाडेका छन्।

विगत एकाध साताको तथ्याङ्क हेर्दा असोज १८ गते ६ हजार ५२२ सवारीबाट ४० हजार ८६९ जना, असोज १७ गते ७ हजार ९९७ सवारीबाट ५४ हजार १४३ जना, असोज १६ गते ७ हजार ३१५ सवारीबाट ४५ हजार १३९ जना र असोज १५ गते ७ हजार ५९१ सवारी साधनमार्फत ४२ हजार ६२० जना यात्रु बाहिरिएका थिए।

चाडपर्व लक्षित यात्रुको चाप र चहलपहल दिनप्रतिदिन बढ्दै गएकाले सोहीअनुरूप उपत्यकाका मुख्य नाका तथा सडकहरूमा ट्राफिक व्यवस्थापन र सुरक्षा निगरानी चुस्त बनाइएको प्रहरी उपरीक्षक सुवेदीले जानकारी दिनुभयो।

दिनगत यात्रु तथा सवारी साधनको तथ्याङ्क