नबिल बैंकको ४२औँ साधारणसभा सम्पन्न: शेयरधनीलाई १५.८०% लाभांश पारित, चुक्ता पुँजी ३३ अर्ब ४० करोड नाघ्यो

काठमाडौँ, असोज २२ गते । नबिल बैंक लिमिटेडको ४२औँ वार्षिक साधारणसभा बिहीबार काठमाडौँमा सफलतापूर्वक सम्पन्न भएको छ। बैंकका अध्यक्ष निर्वाणकुमार चौधरीको अध्यक्षतामा आयोजित साधारणसभाले आर्थिक वर्ष २०८२/८३ को मुनाफाबाट सञ्चालक समितिले प्रस्ताव गरेको कुल १५.८० प्रतिशत लाभांश सर्वसम्मतिले पारित गरेको हो।

पारित लाभांशअनुसार साधारण शेयरधनीहरूले ५ प्रतिशत बोनस शेयर र १०.८० प्रतिशत नगद लाभांश (कर प्रयोजनसहित) प्राप्त गर्नेछन्। यसका साथै सभाले बैंकका अविमोच्य असञ्चिति अग्राधिकार शेयरधनीहरूका लागि ८ प्रतिशतका दरले लाभांश वितरण गर्ने प्रस्तावलाई समेत स्वीकृति दिएको छ।

यस पटकको साधारणसभाको उद्घाटन सत्रमा नबिल बैंकले मौलिक संस्कृतिको संरक्षण र प्रवर्द्धन गर्ने उद्देश्यका साथ विशेष सास्कृतिक प्रस्तुतिहरू समावेश गरेको थियो। ५ प्रतिशत बोनस शेयर जारी गरेपश्चात् बैंकको कुल चुक्ता पुँजी ३३ अर्ब ४० करोड रुपियाँभन्दा बढी पुगेको छ, जसले बैंकको वित्तीय आधारलाई थप सुदृढ बनाएको छ।

साधारणसभामा अध्यक्ष निर्वाणकुमार चौधरीले संस्थागत सुशासन, वित्तीय पारदर्शिता र ग्राहक सन्तुष्टिलाई बैंकले सधैँ उच्च प्राथमिकतामा राख्दै आएको बताउनुभयो। आगामी दिनमा अत्याधुनिक प्रविधिको प्रयोगमार्फत बैंकिङ सेवाहरूलाई थप आधुनिकीकरण र देशव्यापी विस्तार गर्दै लैजाने प्रतिबद्धतासमेत उहाँले व्यक्त गर्नुभयो।