काठमाडौँ उपत्यकामा हतियार देखाएर सिरियल लुटपाट गर्ने ‘आयान माझी समूह’ पक्राउ: चोरीका १५ भन्दा बढी मोटरसाइकल प्रयोग !

काठमाडौँ, असोज २२ गते । काठमाडौँ उपत्यकाका विभिन्न स्थानमा हतियार देखाएर लुटपाट, यात्रु तथा सर्वसाधारणलाई लक्षित गरी सिरियल डाँका चोरी र मोटरसाइकल चोरीमा संलग्न रहेको आरोपमा प्रहरीले ‘आयान माझी समूह’ लाई पक्राउ गरेको छ।

जिल्ला प्रहरी परिसर काठमाडौँले आज सार्वजनिक गरेको विवरण अनुसार सिन्धुलीका आयान माझीको मुख्य योजनामा विगत आठ महिनादेखि यो समूह उपत्यकामा सक्रिय रहँदै आएको थियो।

प्रहरी अनुसन्धानका अनुसार मुख्य योजनाकार माझीले लुटपाटका लागि मोटरसाइकल, हतियार (खुकुरी) र नक्कली नम्बर प्लेटको व्यवस्थापन गरी समूहका अन्य सदस्यहरूलाई परिचालन गर्ने गरेका थिए।

माझीसँगै घटनामा प्रत्यक्ष संलग्न हुने तथा मोटरसाइकल पछाडि बस्ने मनोजकुमार मोक्तान र राकेश सिंहलाई समेत प्रहरीले नियन्त्रणमा लिएको छ। माझी यसअघि पनि डाँका चोरी मुद्दामा कारागार सजाय भुक्तान गरी छुटेका व्यक्ति हुन्।

यस समूहले बिहान र रातिको समयमा एक्लै हिँड्ने महिला तथा पुरुषलाई सुनसान स्थानमा रोकेर हतियार देखाई लुटपाट गर्ने गरेको थियो।

साथै इन्ड्राइभ तथा पठाओको बहाना बनाएर यात्रु र चालकलाई समेत लक्षित गर्ने र गहना देखाउने बहानामा पछाडि पछाडि गएर लुट्ने कार्यशैली अपनाएको पाइएको छ। लुटपाटमा प्रयोग गर्नका लागि मात्रै यस समूहले उपत्यकाका विभिन्न स्थानबाट १५ भन्दा बढी मोटरसाइकल चोरी गरेको अनुसन्धानमा खुलेको छ।

प्रहरीले हालसम्म लुटपाटमा प्रयोग गरिएका दुई थान मोटरसाइकल, एक थान खुकुरी, नक्कली नम्बर प्लेट र वारदातका क्रममा लगाइएका कपडाहरू बरामद गरेको छ।

उपत्यकामा भएका शृङ्खलाबद्ध चोरी तथा लुटपाटका घटनाको सूक्ष्म अनुसन्धान गर्ने क्रममा यो समूहको संलग्नता पुष्टि भएको हो। पक्राउ परेका तीनै जनामाथि थप अनुसन्धान भइरहेको प्रहरीले जनाएको छ।

प्रमुख विवरण तथा गिरोहको कार्यशैली