विद्युत महसुल डिजिटल माध्यमबाट तिर्न ऊर्जामन्त्री विराजभक्त श्रेष्ठको अपिल: काउन्टर सञ्चालनमै वार्षिक करिब ६० करोड खर्च

काठमाडौँ, असोज २२ गते । ऊर्जा, जलस्रोत तथा सिँचाइमन्त्री विराजभक्त श्रेष्ठले डिजिटल माध्यमबाट विद्युत महसुल तिर्न सम्पूर्ण नागरिकहरूलाई अपिल गर्नुभएको छ।

अहिलेको डिजिटल युगमा पनि करिब ७३ प्रतिशत नागरिकले भौतिक रूपमा महसुल सङ्कलन काउन्टरमै पुगेर भुक्तानी गर्ने गरेको तथ्याङ्क प्रस्तुत गर्दै मन्त्री श्रेष्ठले यो अवस्थालाई परिवर्तन गर्नुपर्नेमा जोड दिनुभएको छ।

नेपाल विद्युत प्राधिकरणका १२९ वितरण केन्द्रहरूअन्तर्गत ६५५ वटा महसुल सङ्कलन काउन्टर सञ्चालनमा छन्। यी काउन्टरहरू सञ्चालन गर्नका लागि मात्रै वार्षिक करिब ५९ करोड ७९ लाख रुपियाँ (मासिक करिब ५ करोड रुपियाँ) खर्च हुने गरेको जानकारी मन्त्री श्रेष्ठले दिनुभएको छ। डिजिटल भुक्तानी प्रवर्द्धन गर्न सके यो ठुलो रकम बचत हुने र त्यहाँ कार्यरत जनशक्तिलाई अन्य सेवामा सदुपयोग गर्न सकिने उहाँको भनाइ छ।

डिजिटल भुक्तानी अपनाउँदा नागरिकको समय र आवतजावतको खर्च बचत हुनुका साथै नगद कारोबार घट्दा वित्तीय पारदर्शिता र सुरक्षामा समेत वृद्धि हुने ऊर्जामन्त्री श्रेष्ठले बताउनुभयो। यो केवल भुक्तानी माध्यम परिवर्तन गर्ने कुरा मात्र नभई सार्वजनिक स्रोतको प्रभावकारी सदुपयोग गर्ने र नागरिकको सेवा सहज बनाउने अभियान भएको उहाँले उल्लेख गर्नुभयो।

विशेषगरी डिजिटल भुक्तानी गर्न नजान्ने बुबाआमा, ज्येष्ठ नागरिक तथा आफन्तहरूलाई एक पटक अनलाइन भुक्तानी गर्ने तरिका सिकाइदिन मन्त्री श्रेष्ठले आग्रह गर्नुभएको छ। “तपाईंले दिएको केही मिनेटको समयले उहाँहरूको हरेक महिनाको समय बचाउन सक्छ,” भन्दै उहाँले सम्भव भएसम्म आजैदेखि डिजिटल माध्यमबाट महसुल भुक्तानी गर्न र अरूलाई पनि प्रोत्साहित गर्न अपिल गर्नुभएको छ।