नेपाली कांग्रेस १५औँ महाधिवेशन: आज हुने भनिएको मतदान स्थगित भई शुक्रबार बिहान ७ बजेदेखि हुने

काठमाडौँ, असोज २२ गते । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि बिहीबार हुने भनिएको मतदान स्थगित भएको छ।

खराब मौसम, उम्मेदवार धेरै भएकाले मतपत्र छपाइमा भएको ढिलाइ र प्राविधिक कारण देखाउँदै निर्वाचन समितिले मतदानको कार्यतालिका शुक्रबार बिहानका लागि सारेको हो।

निर्वाचन समितिका सदस्य सचिव राजु कटुवालका अनुसार बिहीबार ढिला मतदान सुरु गर्दा रातको समयमा मतदातालाई असहज हुने भएकाले शुक्रबार बिहान ७ बजेदेखि दिउँसो ३ बजेसम्म मतदान गराउने निर्णय गरिएको छ।

मतपत्र धेरै भएकाले ३२ जना वरिष्ठ अधिवक्ताहरूले मतपत्रमा हस्ताक्षर गरिरहेको र आवश्यक सम्पूर्ण तयारी पूरा भइसकेको निर्वाचन समितिका संयोजक वरिष्ठ अधिवक्ता प्रेमबहादुर खड्काले जानकारी दिनुभयो।

महाधिवेशन एक दिन लम्बिएकाले महाधिवेशन प्रतिनिधिहरूको शुक्रबारको होटल बसाइ र खाना खर्च पार्टीले नै बेहोर्ने आर्थिक व्यवस्थापन समितिका संयोजक उमेश श्रेष्ठले बताउनुभयो।

विधान संशोधन गरी २९७ सदस्यीय बनाइएको केन्द्रीय कार्यसमिति चयनका लागि कुल ७ हजार ३ सय १७ जना (अथवा नामावली रुजुअनुसार ७ हजार २५५) प्रतिनिधिहरूले मतदान गर्नेछन्।

निर्वाचन समितिले प्रतिनिधिको सहजताका लागि राष्ट्रिय सभा गृह र खुलामञ्च परिसरभित्रका विभिन्न हलहरूमा प्रदेश तथा समूह अनुसार छुट्टाछुट्टै मतदान केन्द्र तोकेको छ।

मतदानस्थलमा मोबाइल फोन लगायतका निषेधित सामग्री लैजान पाइने छैन भने परिचयपत्र र मतदाता नामावली रुजु गरेपछि मात्र मतदान गर्न दिइनेछ। शुक्रबार दिउँसो ३ बजे मतदान सकिएलगत्तै मतगणना प्रक्रिया अघि बढाइनेछ।

संशोधित मतदान कार्यतालिका र केन्द्रहरू