चाडपर्वमा हवाई यात्रुलाई राहत: स्वीकृत भाडादरभन्दा सस्तोमा टिकट बेच्न वायुसेवा कम्पनीहरू सहमत

काठमाडौँ, असोज २२ गते । प्रधानमन्त्री वालेन्द्र शाहको कडा निर्देशन र संस्कृति, पर्यटन तथा नागरिक उड्डयनमन्त्री खडकराज पौडेल (गनेश) को सक्रियतापछि आन्तरिक वायुसेवा कम्पनीहरू स्वीकृत भाडादरभन्दा सस्तोमा टिकट बिक्री वितरण गर्न सहमत भएका छन्।

नजिकिँदो चाडपर्वको मौका छोपेर वायुसेवा कम्पनीहरूले हवाई भाडादर अत्यधिक बढाएको भन्ने जन-गुनासो आएपछि प्रधानमन्त्री शाहले गम्भीर चासो व्यक्त गर्नुभएको थियो। सोही निर्देशनका आधारमा नेपाल नागरिक उड्डयन प्राधिकरण (क्यान) ले आज वायुसेवा कम्पनीका पदाधिकारी तथा प्रतिनिधिहरूसँग छलफल आयोजना गरेको हो।

क्यानका महानिर्देशक मुकेश डङ्गोलका अनुसार छलफलपछि सबै आन्तरिक वायुसेवा कम्पनीहरू स्वीकृत अधिकतम भाडादरभन्दा सस्तोमा टिकट उपलब्ध गराउन तयार भएका छन्। नयाँ छुटसहितको भाडादर सम्बन्धी विवरण वायुसेवा कम्पनीहरूले आफ्ना आधिकारिक बिक्री प्लेटफर्म तथा अनलाइन प्रणालीमा तुरुन्तै सार्वजनिक गर्ने निर्णय भएको छ।

सरकारको यो कदमसँगै चाडपर्वको समयमा घर फर्कने तथा यात्रा गर्ने सर्वसाधारण नागरिकहरूलाई ठुलो राहत मिल्ने अपेक्षा गरिएको छ। साथै, क्यानले स्वीकृत भाडादर र सहमति पालना भए/नभएको विषयमा सूक्ष्म अनुगमन गर्नेसमेत जनाएको छ।