आफूले आठ युद्ध रोकेको भन्दै ट्रम्पद्वारा नोबेल शान्ति पुरस्कारमा दाबी, पाउने सम्भावनामा भने आशंका

काठमाडौँ, असोज २२ गते ।अमेरिकी राष्ट्रपति डोनाल्ड ट्रम्पले आफू सन् २०२६ को नोबेल शान्ति पुरस्कारको हकदार भएको पुनः दाबी गर्नुभएको छ।

ह्वाइट हाउसस्थित ओभल अफिसमा सञ्चारकर्मीहरूसँग कुरा गर्दै उहाँले आफूले आठवटा द्वन्द्व र युद्ध समाधान गरेको भन्दै यो पुरस्कार आफूले पाउनुपर्ने बताउनुभएको हो। तर, नर्वेजियन नोबेल समितिले शुक्रबार पुरस्कार घोषणा गर्नै लाग्दा आफूलाई पुरस्कार दिने निर्णय हुनेमा भने उहाँले शङ्का व्यक्त गर्नुभएको छ।

‘उनीहरूले के निर्णय गर्छन्, मलाई थाहा छैन,’ ट्रम्पले भन्नुभयो, ‘सायद म जस्ता व्यक्तिलाई पुरस्कार नदिने उनीहरूको परम्परा छ, तर मैले अन्य कसैले नगरेको काम गरेको छु।‘ गत वर्ष ह्वाइट हाउस फर्किएयता निरन्तर पुरस्कारको दाबी गर्दै आएका ट्रम्पलाई गत जनवरीमा भेनेजुएलाकी विपक्षी नेता मारिया कोरिना मचाडोले आफ्नो सन् २०२५ को नोबेल शान्ति पुरस्कारको पदक हस्तान्तरण गर्नुभएको थियो।

कम्बोडिया, इजरायल र पाकिस्तानका नेताहरूले ट्रम्पलाई नोबेल पुरस्कारका लागि मनोनयन गरेको बताइए पनि यसको स्वतन्त्र पुष्टि हुन सकेको छैन।

अर्कोतर्फ, ट्रम्पले समाधान गरेको दाबी गरेका प्रजातान्त्रिक गणतन्त्र कङ्गो र कम्बोडिया-थाइल्यान्ड सीमा लगायतका क्षेत्रमा पुनः हिंसा भड्किएकाले उहाँको कूटनीतिक भूमिकामाथि प्रश्न उठेको छ। साथै, दोस्रो कार्यकालको पहिलो दिनमै रुस-युक्रेन युद्ध अन्त्य गर्ने उहाँको बाचा पनि अझै निष्कर्षमा पुग्न सकेको छैन।

यसैबिच, इरानमाथि अमेरिका र इजरायलले गरेको आक्रमणपछि सात महिनादेखि जारी तनावका कारण विश्वव्यापी ऊर्जा आपूर्ति प्रभावित भई ग्यासको मूल्य वृद्धि भएको छ। नर्वेजियन नोबेल समितिले शुक्रबार यस वर्षको शान्ति पुरस्कार घोषणा गर्दैछ, जसमा पोप लियो, अन्तर्राष्ट्रिय फौजदारी अदालत (आईसीसी) तथा प्यालेस्टिनी क्षेत्रका लागि संयुक्त राष्ट्रसङ्घका विशेष प्रतिवेदक प्रमुख दाबेदारका रूपमा हेरिएका छन्।