राष्ट्र बैंकद्वारा नयाँ नोट सटही सुविधा सुरु: यसपालि सूचनाबिनै सहजै पाइने

काठमाडौँ, असोज २३ गते । दसैँ, तिहार तथा छठ पर्वको अवसरमा नेपाल राष्ट्र बैंकले सर्वसाधारणलाई नयाँ नोट सटहीको सुविधा उपलब्ध गराएको छ।

अघिल्ला दुई वर्ष सुकिला नोट मात्र वितरण गरेको राष्ट्र बैंकले यस वर्ष नयाँ नोट नै सटही गर्ने व्यवस्था मिलाएको हो। विगतमा जस्तो निश्चित सार्वजनिक सूचना जारी नगरी राष्ट्र बैंकका केन्द्रीय तथा क्षेत्रीय कार्यालय र बैंक तथा वित्तीय संस्थाका शाखाहरूबाटै सहजै नयाँ नोट साट्न सकिनेछ।

राष्ट्र बैंकको मुद्रा व्यवस्थापन विभागका प्रमुख अनुज दाहालका अनुसार असोज १ देखि २० गतेसम्ममा १० अर्ब रुपियाँ बराबरका नयाँ नोट बजारमा पठाइसकिएको छ। जसमध्ये ८ अर्ब ३३ करोड रुपियाँ बैंक तथा वित्तीय संस्थाहरूलाई र १ अर्ब ६७ करोड रुपियाँ सर्वसाधारणलाई सिधै वितरण भइरहेको छ। बैंकहरूलाई दिइएको रकम पनि सर्वसाधारणकै सटहीका लागि उपयोग हुनेछ।

यस वर्ष नयाँ नोटको पर्याप्त भण्डारण रहेकाले सर्वसाधारणलाई आवश्यकताअनुसार १ देखि २ सेटसम्म नयाँ नोट सटही दिइएको छ। साथै, राष्ट्र बैंकले यसपालि बैंकहरूलाई एटीएम (ATM) मा ५ सय र हजारका अलावा १०० दरका नोटसमेत राख्न निर्देशन दिएकाले बैंकहरूमा विगतको जस्तो अत्यधिक भीडभाड देखिएको छैन। डिजिटल बैंकिङको प्रयोग बढेकाले पनि नगदको माग केही घटेको बताइएको छ।

सामान्यतया दसैँ-तिहारमा ६० देखि ७० अर्ब रुपियाँ बराबरका नोट ढुकुटीबाट बाहिरिने गर्छन्, जसमध्ये १२ देखि १५ अर्ब रुपियाँ सर्वसाधारणको हातमा पुग्छ। राष्ट्र बैंकले नोट छपाइ तथा व्यवस्थापनमा वार्षिक करिब ३ अर्ब रुपियाँ खर्च गर्ने भएकाले नोटको जतन गरी प्रयोग गर्न र digital कारोबारलाई प्रोत्साहन गर्न आह्वान गरेको छ।