ग्लोबल आइएमई बैङ्कद्वारा सेयरधनीलाई १० प्रतिशत लाभांश घोषणा: खुद नाफा ६ अर्ब ४ करोड पुग्यो

काठमाडौँ, असोज १७ गते । ग्लोबल आइएमई बैङ्क लिमिटेडले आफ्ना सेयरधनीहरूलाई कुल १० प्रतिशत लाभांश वितरण गर्ने भएको छ।

बैङ्कको शुक्रबार सम्पन्न २० औँ वार्षिक साधारण सभाले आर्थिक वर्ष २०८२/८३ को मुनाफाबाट सेयरधनीहरूलाई ४ प्रतिशत बोनस सेयर र ६ प्रतिशत नगद लाभांश दिने प्रस्ताव पारित गरेको हो।

बैङ्क सञ्चालक समितिका अध्यक्ष चन्द्रप्रसाद ढकालले प्रस्तुत गर्नुभएको वित्तीय विवरणअनुसार समीक्षा अवधिमा बैङ्कले रु ६ अर्ब ४ करोड खुद नाफा आर्जन गरेको छ। यो नाफा अघिल्लो आर्थिक वर्षको तुलनामा १५.९० प्रतिशतले बढी हो।

समीक्षा अवधिमा बैङ्कको सञ्चालन मुनाफा रु ९ अर्ब ६० करोड पुगेको छ। साधारण सभाबाट स्वीकृत ४ प्रतिशत बोनस सेयर वितरण गरेपछि बैङ्कको चुक्ता पुँजी वृद्धि भई रु ३९ अर्ब ६८ करोड ६० लाख पुगेको छ।

साधारण सभालाई सम्बोधन गर्दै अध्यक्ष ढकालले बैङ्कलाई थप सुरक्षित, भरपर्दो र सन्तुलित रूपमा विस्तार गर्दै लैजाने प्रतिबद्धता व्यक्त गर्नुभयो। उहाँले ग्राहकहरूलाई अझ सहज र अत्याधुनिक वित्तीय सेवा प्रवाह गर्न बैङ्कले डिजिटल बैङ्किङ प्रणालीमा लगानी विस्तार गरिरहने जानकारी दिनुभयो।