मुग्लिङ-काठमाडौँ सडकखण्ड अवरुद्ध भएपछि हेटौँडा हुँदै सवारी व्यवस्थापनमा प्राथमिकता

काठमाडौँ, असोज २४ गते । मुग्लिङ-काठमाडौँ सडकखण्ड अवरुद्ध भएपछि हेटौँडा हुँदै काठमाडौँ आवतजावत गर्ने सवारीसाधनको चाप बढेको छ। यसलाई मध्यनजर गर्दै बडादसैँका यात्रुवाहक सवारीसाधनलाई पहिलो प्राथमिकतामा राखेर त्रिभुवन राजपथ लगायत वैकल्पिक सडकमार्गमा सवारी व्यवस्थापन गरिएको छ।

जिल्ला ट्राफिक प्रहरी कार्यालय मकवानपुरका प्रमुख रमेश विष्टका अनुसार यात्रुवाहक सवारीसाधनपछि इन्धन तथा खाना पकाउने ग्यास बोकेका सवारीसाधनलाई प्राथमिकता दिइएको छ। त्रिभुवन राजपथ साँघुरो हुनुका साथै घुम्तीहरूमा ठूला सवारीसाधनलाई आवतजावत गर्न कठिनाई हुने भएकाले आलोपालो प्रणालीमार्फत सवारी सञ्चालन गरिएको छ र केही सवारीसाधनलाई एकदेखि दुई घण्टासम्म रोक्नुपर्ने अवस्था रहेको छ।

जिल्ला प्रशासन कार्यालय मकवानपुरले निर्धारण गरेको व्यवस्था अनुसार त्रिभुवन राजपथमा ११ मिटरसम्म लम्बाइ भएका यात्रुवाहक सवारीसाधन मात्र सञ्चालन गर्न दिइएको छ भने १० चक्काभन्दा बढी तथा १५ टनभन्दा बढी भार बोकेका मालवाहक सवारीसाधनलाई रोक लगाइएको छ। साना यात्रुवाहक सवारीसाधनका लागि भने भीमफेदी सडकखण्डबाट दोहोरो आवागमनको व्यवस्था मिलाइएको छ।