युवा तथा रोजगार मन्त्री रामजी यादवद्वारा सुनसरीमा युवा र श्रमिकसँग छलफल: स्थानीयस्तरमै सीप र रोजगारी विस्तार गरिने

सुनसरी, असोज २० गते । युवा, श्रम तथा रोजगार मन्त्री रामजी यादवले सुनसरीका विभिन्न नगरपालिका, गाउँपालिका तथा स्थानीय बजार क्षेत्रमा पुगेर युवा तथा श्रमिकहरूसँग प्रत्यक्ष भेटघाट र छलफल गर्नुभएको छ।

आन्तरिक रोजगारीतर्फ युवाहरूलाई आकर्षित गर्न, श्रमिकको मनोबल उच्च बनाउन र स्थानीयस्तरमा रोजगारीका अवसरहरू प्रवर्द्धन गर्ने उद्देश्यले मन्त्री यादवले यो भ्रमण गर्नुभएको हो।

युवा, श्रम तथा रोजगार मन्त्रालयले कोशी प्रदेशको इटहरीमा असोज १४ गतेदेखि २० गतेसम्म आयोजना गरेको ‘सीप तथा रोजगार मेला‘ सम्पन्न भए पनि स्थानीयस्तरमा सीप विकास तथा रोजगारी प्रवर्द्धनका कार्यक्रमहरूलाई निरन्तरता दिइने मन्त्री यादवले प्रतिबद्धता व्यक्त गर्नुभयो।

सरकारले आर्थिक वर्ष २०८३/०८४ देखि २०९२/०९३ सम्मलाई ‘रोजगार प्रवर्द्धन दशक’का रूपमा अघि बढाएकाले सोही योजना अनुसार मेला तथा सीपमूलक कार्यक्रमहरू सञ्चालन गरिएको उहाँको भनाइ छ।

भ्रमणका क्रममा मन्त्री यादवले कोशी गाउँपालिकाको हरिपुर र लौकही, बराहक्षेत्रको मधुवन, इनरुवा नगरपालिकाका क्षेत्रहरू तथा रामधुनीको मोहनपुर गाउँ पुगेर स्थानीयसँग संवाद गर्नुभएको थियो।

राष्ट्रिय स्वतन्त्र पार्टीका नेता दुर्गा यादवका अनुसार भेटघाटमा स्थानीयस्तरमा उपलब्ध रोजगारीका सम्भावना, युवाको सीप, श्रमिकका समस्या र बजारको मागअनुसार तालिम दिने विषयमा छलफल भएको थियो।

मन्त्री यादवलाई प्रत्यक्ष भेटेर आफ्ना समस्या तथा सुझावहरू राख्न पाएकोमा स्थानीय युवाहरूले खुसी व्यक्त गरेका छन्। कोशी गाउँपालिकाका युवा दिलिप यादवले स्थानीयस्तरमै सीप र रोजगारी जोड्ने सरकारको प्रतिबद्धताले युवाहरूमा नयाँ आशा जगाएको बताउनुभयो।