बोका किन्दा नक्कली नोट प्रयोग गर्ने दुई जना पक्राउ

ओखलढुङ्गा, असोज २१ गते । ओखलढुङ्गाको सुनकोशी गाउँपालिका–९, ककनीमा बोका किनबेचका क्रममा नक्कली नोटको कारोबार गरेको आरोपमा प्रहरीले दुई जनालाई नियन्त्रणमा लिएको छ।

जिल्ला प्रहरी कार्यालयका प्रहरी नायब उपरीक्षक राजबाबु महर्जनका अनुसार पक्राउ पर्नेमा चम्पादेवी गाउँपालिकास्थित केउरिनीका २१ वर्षीय कृष्ण खत्री र ३३ वर्षीय ध्रुवबहादुर खत्री रहेका छन्।

उनीहरूले सुनकोशी–९ का स्थानीय हस्तबहादुर तामाङ र वीरबहादुर तामाङबाट तीन वटा बोका खरिद गर्दा जम्मा रु २८ हजारको कारोबार गरेका थिए। सो क्रममा उनीहरूले रु १९ हजार बराबरका १ हजार दरका १९ थान नक्कली नोट प्रयोग गरेको पाइएपछि प्रहरीले नियन्त्रणमा लिएको हो।

प्रारम्भिक सोधपुछका क्रममा उक्त नक्कली नोट काठमाडौँबाट ल्याइएको खुलेको छ। घटनाका सम्बन्धमा प्रहरीले थप गहन अनुसन्धान अघि बढाएको प्रहरी नायब उपरीक्षक महर्जनले जानकारी दिनुभयो।