काठमाडौँ उपत्यकामा १,००० भन्दा बढी केन्द्रबाट प्रतिकेजी ११० रुपियाँमा चिनी पाइने

काठमाडौँ, असोज १ गते । काठमाडौँ उपत्यकाका उपभोक्ताले अब उपत्यकाका १,००० भन्दा बढी खुद्रा, थोक तथा सुपरमार्केट (भाटभटेनी, बिगमार्ट, सेल्सबेरी आदि) बाट प्रतिकेजी ११० रुपियाँमा सहज रूपमा चिनी पाउने भएका छन्।

चाडपर्व नजिकिँदै गर्दा बजारमा कृत्रिम अभाव र मूल्यवृद्धिको गुनासो बढेपछि उद्योग, वाणिज्य तथा आपूर्तिमन्त्री दीपककुमार साहको अध्यक्षतामा बसेको बैठकले यो सहमति गरेको हो।

सरकारको निर्णय अनुसार साल्ट ट्रेडिङ कर्पोरेसनले खुद्रा तथा थोक व्यापारीलाई प्रतिकेजी १०५ रुपियाँमा चिनी उपलब्ध गराउनेछ र व्यापारीहरूले प्रतिकेजी ११० रुपियाँमा उपभोक्तालाई बिक्री गर्नुपर्नेछ। आपूर्ति व्यवस्थापनका लागि भारतबाट १ प्रतिशत भन्सार छुटमा २५ हजार मेट्रिक टन र स्वदेशी उद्योगहरूबाट २० हजार मेट्रिक टन गरी कुल ४५ हजार मेट्रिक टन चिनी खरिद गर्ने प्रक्रिया अघि बढेको छ, जसले आगामी कात्तिकसम्मको माग धान्नेछ।

वाणिज्य, आपूर्ति तथा उपभोक्ता संरक्षण विभागका अनुसार नेपालमा वार्षिक ३ लाख मेट्रिक टन चिनीको माग रहने गरेकोमा स्वदेशी उत्पादनले १ लाख मेट्रिक टन मात्र धान्छ। मन्त्रालयका अनुसार कुल मागको ४० प्रतिशत चिनी औद्योगिक प्रयोजन (पेप्सी, कोकाकोला, मिठाई आदि) मा र ६० प्रतिशत आम-उपभोक्ताले प्रयोग गर्छन्।

उद्योगीहरूले कृत्रिम अभाव सिर्जना गरेको आरोप लागिरहेका बेला खुद्रा व्यापार सङ्घ र उपभोक्ता मञ्चले सरकारको यस निर्णयले चाडपर्वको मुखमा उपभोक्तालाई ठूलो राहत पुग्ने विश्वास व्यक्त गरेका छन्।

चिनी आपूर्ति तथा मूल्यसम्बन्धी मुख्य विवरण: