प्रदेशमै पहिलो जामुनखाडी सिमसारमा पर्यटक आकर्षित गर्न ‘फिसिङ’ सेवा सुरु

झापा, भदौ २१ गते । झापाको कनकाई नगरपालिकास्थित प्रसिद्ध जामुनखाडी सिमसार तथा पर्यटकीय स्थलमा आन्तरिक तथा बाह्य पर्यटकलाई आकर्षित गर्न फिसिङ (बल्छीबाट माछा मार्ने) कार्यक्रम सुरु गरिएको छ।

यसअघि जङ्गली जनावरको अवलोकन र बोटिङका लागि चर्चित रहेको यस स्थानमा पर्यटकलाई थप मनोरञ्जन प्रदान गर्ने उद्देश्यले फिसिङ सुविधा थप गरिएको जामुनखाडी सामुदायिक वनका अध्यक्ष परशुराम गिरीले जानकारी दिनुभयो।

सामुदायिक वन संस्थाका सचिव दीपक ओलीका अनुसार पर्यटकहरूका लागि रु. १०० को टिकटमा एउटा टाँगो (बल्छी) र चारो उपलब्ध गराइने व्यवस्था गरिएको छ। पोखरीमा पर्यटकले पारेका माछा निश्चित मूल्य तोकेर खरिद गरी घर लैजान पाउने प्रबन्धसमेत मिलाइएको छ। यसका लागि सामुदायिक वन क्षेत्रभित्रको एउटा छुट्टै पोखरीमा माछापालन गरिएको छ, जहाँ फिसिङसँगै बोटिङसमेत गर्न सकिन्छ।

सामुदायिक वनमा सङ्कटमा रहेका चितुवा, मृग, अजगर, भालु लगायतका जनावर तथा गिद्ध, चिल, हुचिल, लाटोकोसेरो जस्ता पन्छीहरू संरक्षण गरेर राखिएको छ। जङ्गली जनावर अवलोकन र नौका विहारपछि पानीमा बल्छी खेल्न चाहने पर्यटकका लागि यो थप आकर्षण बनेको छ।

प्राकृतिक पोखरीमा यस्तो फिसिङ सुविधा कोशी प्रदेशमै पहिलो भएको वन समूहको दाबी छ। यो सेवा सुरु भएसँगै नेपालका विभिन्न स्थानका साथै छिमेकी मुलुक भारतबाट समेत पर्यटकहरू आउन थालेका छन्।

Summary Highlights