काठमाडौँ, भदौ ५ गते । नेपाल ‘ए’ पुरुष राष्ट्रिय क्रिकेट टोलीले अस्ट्रेलियामा जारी टप एन्ड टी–२० सिरिज २०२६ मा आज आफ्नो पहिलो खेल खेल्दैछ। नेपालले प्रतियोगिताको पहिलो खेलमा घरेलु टोली नर्दन टेरिटोरी स्ट्राइक (एनटी स्ट्राइक) को सामना गर्न लागेको हो।

डार्विनस्थित मरारा क्रिकेट मैदानमा खेल नेपाली समयअनुसार आज दिउँसो २:१५ बजे सुरु हुनेछ। नेपाल दोस्रोपटक टप एन्ड टी–२० सिरिजमा सहभागी भएको हो। गत संस्करणमा नेपालले सिनियर राष्ट्रिय टोली पठाएको थियो। त्यतिबेला नेपालले लिग चरणका ६ खेलमध्ये दुई खेलमा जित हात पार्दा चार खेलमा पराजय बेहोरेको थियो।

यसपटक भने नेपाल ‘ए’ टोलीले गत वर्षको अनुभवबाट सिक्दै उत्कृष्ट प्रदर्शन गरेर प्रतियोगिताको अर्को चरणमा पुग्ने लक्ष्य राखेको छ। त्यसैअनुसार क्रिकेट एसोसिएसन अफ नेपाल (क्यान) ले सिनियर राष्ट्रिय टोलीका लागि खेलिसकेका केही महत्वपूर्ण खेलाडीलाई समेत ‘ए’ टोलीमा समावेश गरेको छ।

नेपालको टोलीमा कुशल भुर्तेल, लोकेश बम, कुशल मल्ल, गुलशनकुमार झा लगायत राष्ट्रिय टोलीबाट खेलिसकेका खेलाडी छन्। तीमध्ये अधिकांशले गत वर्षको टप एन्ड टी–२० सिरिजको अनुभवसमेत बटुलेका छन्। यसले अस्ट्रेलियाको पिच र वातावरणमा नेपाली टोलीलाई फाइदा पुग्ने अपेक्षा गरिएको छ।

एनटी स्ट्राइकसँग दोस्रो भेट

नेपालले नर्दन टेरिटोरी स्ट्राइकसँग टप एन्ड टी–२० मा दोस्रोपटक प्रतिस्पर्धा गर्न लागेको हो। गत संस्करणमा भएको भेटमा नेपाल ४२ रनले पराजित भएको थियो। त्यसैले यसपटक नेपालसँग उक्त हारको बदला लिँदै प्रतियोगितामा सुखद सुरुआत गर्ने अवसरसमेत छ।

नेपाल ‘ए’ को कप्तानी अनिलकुमार साहले गर्दैछन्। टोलीमा कुशल भुर्तेल, लोकेश बम, कुशल मल्ल, पवन सर्राफ, दीपक डुम्रे, आकाश चन्द, शाहाब आलम, विपिन खत्री, युवराज खत्री, रिजन ढकाललगायतका खेलाडी छन्।

नेपालले लिग चरणमा कुल ६ खेल खेल्नेछ। एनटी स्ट्राइकपछि नेपालले अगस्ट २२ मा बंगलादेश हाई पर्फर्मेन्स, अगस्ट २४ मा होबार्ट हरिकेन्स एकेडेमी, अगस्ट २६ मा एसीटी कमेट्स, अगस्ट २७ मा किङ्समेन र अगस्ट २९ मा भिक्टोरिया सीए–११ विरुद्ध खेल्नेछ।

टप एन्ड टी–२० सिरिज अगस्ट २१ देखि ३० सम्म डार्विनमा सञ्चालन हुँदैछ। प्रतियोगिता नेपालका उदीयमान खेलाडीका लागि अस्ट्रेलियाली क्रिकेट वातावरणमा आफ्नो क्षमता परीक्षण गर्ने महत्वपूर्ण अवसरका रूपमा हेरिएको छ।