भारतसामु उरुग्वेको कठिन चुनौती

काठमाडौँ, असोज १९ गते । भारतले मंगलबार ६ अक्टोबर मा दुईपटकको विश्वकप विजेता उरुग्वेसँग आफ्नो तेस्रो तथा अन्तिम फिफा अन्तर्राष्ट्रिय मैत्रीपूर्ण खेल खेल्दैछ।

भारतले यसअघि अक्टोबर ३ मा सोही मैदानमा पाँचपटकको विश्वकप विजेता ब्राजिलसँग खेलेको थियो। ५० हजारभन्दा बढी दर्शक उपस्थित खेलमा भारत ०–४ ले पराजित भएको थियो। यद्यपि खेलको सुरुवाती चरणमा म्यानभिर सिंह र रायन विलियम्सले प्रभावशाली प्रदर्शन गरेका थिए।

अब भारत उरुग्वेविरुद्ध गोल गर्ने लक्ष्यमा हुनेछ। भारतले गत महिना बेंगलुरुमा पानामासँग १–१ को बराबरी खेलेको थियो।

उता उरुग्वेले आफ्नो पछिल्लो मैत्रीपूर्ण खेलमा दक्षिण कोरियालाई ४–२ ले पराजित गरेको छ। त्यसैले फिफा वरीयता र पछिल्लो प्रदर्शनका आधारमा उरुग्वेलाई खेलको बलियो दाबेदार मानिएको छ। तर घरेलु मैदानमा खेल्ने भारतलाई हल्का रूपमा लिन नसकिने अपेक्षा गरिएको छ।

मेस्सीको कार्यक्रमका टिकटधारीलाई भारत–उरुग्वे खेलको निःशुल्क पास

अर्जेन्टिनाका स्टार लियोनल मेस्सीको डिसेम्बर २०२५ मा कोलकातामा भएको कार्यक्रममा टिकट खरिद गरेर पनि उनलाई राम्रोसँग हेर्न नपाएका दर्शकलाई भारत–उरुग्वे मैत्रीपूर्ण खेलका लागि निःशुल्क पास उपलब्ध गराइने भएको छ।

पश्चिम बंगाल सरकारले आगामी ६ अक्टोबर २०२६ मा कोलकातास्थित विवेकानन्द युवा भारती क्रीडाङ्गण (साल्ट लेक स्टेडियम)मा हुने भारत र उरुग्वेबीचको खेलका लागि प्रभावित दर्शकलाई निःशुल्क पास दिने घोषणा गरेको हो।

खेलकुदमन्त्री खानले मुख्यमन्त्री सुवेन्दु अधिकारीले भारत–ब्राजिल खेलपछि गरेको प्रतिबद्धताअनुसार दर्शकप्रति सद्भावस्वरूप यो सुविधा प्रदान गर्न लागिएको बताएका छन्।

मेस्सीको कार्यक्रममा व्यवस्थापनमाथि प्रश्न

मेस्सीको डिसेम्बर २०२५ को कोलकाता भ्रमणमा हजारौँ फुटबल समर्थक सहभागी भएका थिए। तर कार्यक्रमपछि अव्यवस्था, अत्यधिक भीड र भीआईपीलाई प्राथमिकता दिइएको भन्दै आयोजक तथा व्यवस्थापनमाथि आलोचना भएको थियो।

केही टिकटधारीले शुल्क तिरेर कार्यक्रममा प्रवेश गरे पनि मेस्सीलाई राम्रोसँग हेर्न नपाएको गुनासो गरेका थिए। अहिले त्यही घटनाबाट प्रभावित दर्शकलाई भारत–उरुग्वे खेलको निःशुल्क पास दिने निर्णय गरिएको हो।

यसअघि कोलकातामा भएको भारत–ब्राजिल खेलमा करिब ५१ हजार टिकट बिक्रीका लागि उपलब्ध गराइएको र करिब २० हजार सिट खाली रहेको राज्य सरकारले जनाएको थियो। मुख्यमन्त्री अधिकारीले उक्त खेलमा फिफाको मापदण्ड पालना गरिएको र मन्त्री तथा प्रहरी अधिकारीहरू फोटो खिच्न मैदानमा प्रवेश नगरेको दाबी गरेका थिए।