दसौं राष्ट्रिय खेलकुद तोकिएकै मितिमा हुने, द्विविधा नराख्न मन्त्री पोखरेलको आग्रह: सुर्खेतमा मूल आयोजक समितिको बैठक

सुर्खेत, असोज १८ गते । राष्ट्रिय खेलकुद परिषद्का अध्यक्ष एवं शिक्षा तथा खेलकुदमन्त्री सस्मित पोखरेलले दसौं राष्ट्रिय खेलकुद निर्धारित मितिमै हुने भन्दै प्रतियोगिता सर्नेमा अब कुनै द्विविधा नराख्न आग्रह गर्नुभएको छ।

सुर्खेतमा आइतबार बसेको मूल आयोजक समितिको बैठकसँगै प्रतियोगिताको तयारी औपचारिक रूपमा अघि बढेको घोषणा गर्दै उहाँले गाउँ-गाउँका प्रतिभालाई अवसर दिने र खेलकुदमार्फत जीविकोपार्जनको वातावरण बनाउनुपर्नेमा जोड दिनुभयो।

कर्णाली प्रदेशका मुख्यमन्त्री मंगलबहादुर शाहीले मूल आयोजक समितिको बैठक कर्णालीमै बसेकाले विगतका सम्पूर्ण आशंका अन्त्य भएको र निर्धारित समयमै प्रतियोगिता सम्पन्न गर्न प्रदेश सरकारले आवश्यक अधिकांश तयारी अघि बढाइसकेको जानकारी दिनुभयो। यो प्रतियोगिता राजधानी वीरेन्द्रनगरसहित प्रदेशका विभिन्न जिल्लामा सञ्चालन गरिने र यसले कर्णालीमा खेल पूर्वाधार विस्तार तथा खेलाडी उत्पादनमा टेवा पुर्‍याउने उहाँको भनाइ छ।

प्रतियोगिता व्यवस्थापनका लागि आवास, खानेपानी, सुरक्षा र स्वास्थ्य टोली परिचालनको काम तीव्र पारिएको छ। कर्णाली प्रदेशका सामाजिक विकासमन्त्री जितबहादुर मल्लका अनुसार सुरक्षाका लागि डीआईजीको नेतृत्वमा समिति गठन गरिएको छ भने होटल व्यवसायीहरूसँग आवास व्यवस्थापनबारे छलफल भइरहेको छ। राष्ट्रिय खेलकुद परिषद्का सदस्य-सचिव रामचरित्र मेहताले यो प्रतियोगितालाई खेल उत्सवका रूपमा भव्य रूपमा आयोजना गरिने बताउनुभयो।

प्रतियोगितामा पारा खेलकुदलाई समेत समावेश गर्न नेपाल सरकारले चालु आर्थिक वर्षमा तीन करोड रुपियाँभन्दा बढी बजेट उपलब्ध गराएको सदस्य-सचिव मेहताले जानकारी दिनुभयो।

दसौँ राष्ट्रिय खेलकुद सकिएलगत्तै पारा खेलकुद आयोजना गरिने र सम्भव भएसम्म यसलाई पनि कर्णालीमै सञ्चालन गर्ने विषयमा छलफल भइरहेको छ। दसौँ राष्ट्रिय खेलकुद आगामी मङ्सिर १६ देखि २९ गतेसम्म सञ्चालन हुनेछ।

दसौं राष्ट्रिय खेलकुद आयोजना विवरण