11/19/2026, 17:02:53
बिहिबार, मङि्सर ०४, २०८३

हेटौंडा–भीमफेदी–कुलेखानी मार्गमा यात्रुवाहक सवारी रोक : कान्ति लोकपथ प्रयोग गर्न आग्रह

हरिबोधिनी एकादशीका अवसरमा भीमफेदी–१, त्रिखण्डीस्थित त्रिखण्डेश्वर महादेव मन्दिर क्षेत्रमा मेला लाग्ने भएकाले जिल्ला प्रशासन कार्यालय मकवानपुरले एक दिनका लागि उक्त रुटमा यात्रुवाहक सवारीसाधन सञ्चालनमा रोक लगाएको हो।


काठमाडौँ, मङ्सिर ३ गते । हेटौंडा–भीमफेदी–कुलेखानी हुँदै काठमाडौँ आउजाउ गर्ने यात्रुवाहक सवारीसाधनलाई शुक्रबार एक दिन उक्त मार्ग भएर आवत-जावत गर्न रोक लगाइएको छ।

जिल्ला प्रशासन कार्यालय मकवानपुरले भीमफेदी गाउँपालिका–१, त्रिखण्डीस्थित त्रिखण्डेश्वर महादेव मन्दिर क्षेत्रमा मेला तथा जात्रा लाग्ने भएकाले उक्त मार्ग हुँदै काठमाडौँ जाने यात्रुवाहक सवारीसाधनलाई कान्ति लोकपथ प्रयोग गर्न अनुरोध गरेको हो।

जिल्ला प्रशासन कार्यालय मकवानपुरले बिहीबार जारी गरेको सूचनामा शुक्रबार हरिबोधिनी एकादशीका अवसरमा त्रिखण्डीमा मेला लाग्ने भएकाले यात्रुवाहक सवारीसाधनलाई कान्ति लोकपथ भएर आवत-जावत गर्न भनिएको छ। मेला अवधिभर दर्शनार्थीको चाप बढ्ने भएकाले सवारी व्यवस्थापन र सुरक्षालाई ध्यानमा राखी वैकल्पिक मार्ग प्रयोग गर्न प्रशासनले आग्रह गरेको छ।

त्रिखण्डेश्वर महादेव मन्दिर सडकछेउमै भएकाले भक्तजनको भीडभाड र साँघुरो तथा भिरालो बाटोको जोखिमलाई मध्यनजर गर्दै यात्रा सुरक्षित र सहज बनाउन शुक्रबार उक्त सडक भएर यात्रुवाहक सवारीसाधन चलाउन रोक लगाइएको प्रमुख जिल्ला अधिकारी वसन्त अधिकारीले बताउनुभयो।

‘हेटौंडा–भैंसे–भीमफेदी–कुलेखानी रुटको सट्टा उक्त दिन कान्ति लोकपथबाट आवत-जावत गर्न तथा गराउन सम्बद्ध सबै पक्षलाई आग्रह गरिएको छ,’ प्रमुख जिल्ला अधिकारी अधिकारीले भन्नुभयो।

विवरण तथ्य / जानकारी
प्रभावित मार्ग हेटौंडा–भैंसे–भीमफेदी–कुलेखानी (यात्रुवाहक सवारीसाधन रोक)
वैकल्पिक मार्ग कान्ति लोकपथ
रोक लगाइएको दिन तथा कारण शुक्रबार (हरिबोधिनी एकादशीका अवसरमा त्रिखण्डेश्वर महादेव मन्दिर मेला र भीडभाड/जोखिम)
आग्रह गर्ने निकाय / अधिकारी जिल्ला प्रशासन कार्यालय मकवानपुर (प्रमुख जिल्ला अधिकारी वसन्त अधिकारी)