काठमाडौँ, मङ्सिर ३ गते । रसुवाको भोटेकोशी नदीमा गत भदौ १० गते आएको बाढीमा ज्यान गुमाएका योगदानकर्ताका आश्रित परिवारलाई सामाजिक सुरक्षा कोषले पेन्सन दिने प्रक्रिया सुरु गरेको छ।
कोषका अनुसार पीडित परिवारको दाबीबमोजिम पेन्सन सुविधा पाउन योग्य भए वा नभएको विस्तृत परीक्षण गरेर प्रक्रिया अगाडि बढाइएको हो। हाल कोषले १७४ जना योगदानकर्ताका परिवारबाट आएका दाबीमाथि परीक्षण गरिरहेको जनाएको छ, जसका लागि गत भदौमै निर्देशक उत्तमराज नेपालको संयोजकत्वमा कार्यदल गठन गरिएको थियो।
कार्यदलका संयोजक नेपालका अनुसार हिमबाढी प्रभावित क्षेत्रका विभिन्न जलविद्युत् कम्पनी, बैङ्क तथा वित्तीय संस्था र तिनमा कार्यरत सुरक्षाकर्मीका परिवारबाट पेन्सन दाबीसहितका निवेदन प्राप्त भएका छन्। कोषको नियम अनुसार योगदान सुरु गरेको मितिदेखि मृत्यु हुँदासम्म नियमित योगदान गरेको हुनुपर्ने प्रावधान रहेकाले बाढीअघि नियमित योगदान भए नभएको परीक्षण भइरहेको छ।
कोषले प्रभावित क्षेत्रका १५ स्थानीय तहका ३९ सूचीकृत रोजगारदाता प्रभावित भएको र पाँच सयभन्दा बढी श्रमिक तथा कर्मचारी बेपत्ता वा मृतकमध्ये १७४ जना मात्रै कोषमा नियमित योगदान गर्ने योगदानकर्ता रहेको पुष्टि गरेको छ।
सामाजिक सुरक्षा कोषको व्यवस्था अनुसार योगदान गरिरहेकै अवस्थामा मृत्यु भएमा आश्रित परिवारले मृतकले पाउने मासिक तलबको ६० प्रतिशत रकम निवृत्तिभरण (पेन्सन) का रूपमा पाउनेछन्।
त्यस्तै, सन्तति २१ वर्ष नपुगुन्जेलसम्म शैक्षिक वृत्तिबापत अन्तिम आधारभूत पारिश्रमिकको ४० प्रतिशत रकम मासिक रूपमा (दामासाहीले दुई सन्ततिसम्म) र अविवाहित मृतकको हकमा आश्रित बाबुआमाले आधारभूत पारिश्रमिकको ६० प्रतिशत रकम जीवनभर पाउने व्यवस्था छ। साथै, अन्तिम संस्कार खर्चबापत परिवारले एकमुस्ट २५ हजार रुपैयाँसमेत प्राप्त गर्नेछन्।
जलविद्युत् आयोजनामा कार्यरत इन्जिनियर तथा अनुभवी प्राविधिक जनशक्तिका आश्रित परिवारले मासिक न्यूनतम ५० हजार रुपैयाँसम्म पेन्सन पाउने कोषले जनाएको छ।
हालसम्म विभिन्न रोग वा दुर्घटनामा परी ज्यान गुमाएका एक हजारभन्दा बढी परिवारले आजीवन निवृत्तिभरणको सुविधा पाइरहेका छन् र आश्रित परिवार योजनाअन्तर्गत हालसम्म ४० करोड ५८ लाख ५२ हजार रुपैयाँ निवृत्तिभरणमा खर्च भइसकेको छ। कोषले हाल मासिक न्यूनतम चार हजारदेखि अधिकतम एक लाख रुपैयाँसम्म निवृत्तिभरण उपलब्ध गराउँदै आएको छ।
| विवरण | तथ्य / जानकारी |
| प्रक्रिया सुरु गर्ने निकाय | सामाजिक सुरक्षा कोष (कार्यदल संयोजक: निर्देशक उत्तमराज नेपाल) |
| परीक्षण भइरहेको दाबी | १७४ जना योगदानकर्ताका परिवार (भदौ १० को भोटेकोशी बाढी प्रभावित) |
| प्रमुख सुविधाहरू | मासिक तलबको ६०% पेन्सन, ४०% शैक्षिक वृत्ति, २५,००० अन्तिम संस्कार खर्च |
| हालसम्मको वितरण | एक हजारभन्दा बढी परिवारलाई सुविधा, कुल ४० करोड ५८ लाख ५२ हजार रुपैयाँ खर्च |
What if you could work from Anywhere?
Explore More with something that can change your Life!










प्रतिक्रिया दिनुहोस्