काठमाडौँ, मङ्सिर ३ गते । नेकपा (एमाले) को बिहीबार सम्पन्न राष्ट्रिय कार्यकर्ता भेलाले लोकतन्त्रको पुनर्बहाली, राष्ट्रिय स्वाधीनताको रक्षा, पार्टीको संगठनात्मक सुदृढीकरण तथा स्थानीय निर्वाचनको तयारी लगायत विषय समेटेर २१ बुँदे समसामयिक विशेष प्रस्ताव र संकल्प पारित गरेको छ।
दुईदिने भेलाले आगामी स्थानीय, प्रदेश र राष्ट्रियसभा निर्वाचनको पूर्व-तयारी गर्ने तथा आवश्यक परे राष्ट्रिय स्वाधीनताको रक्षा र लोकतान्त्रिक प्रक्रियाको पुनर्बहालीका लागि आन्दोलनको तयारी गर्ने निर्णय गरेको छ। ‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल, सुखी नेपाली हाम्रो गन्तव्य’ मूल नाराका साथ आयोजित भेलामा अध्यक्ष केपी शर्मा ओलीले उद्घाटन गर्नुभएको थियो भने देशभर र प्रवासबाट गरी ३ हजार ४१४ प्रतिनिधिको सहभागिता रहेको थियो।
भेलाले २०८२ भदौ २३ र २४ गतेका घटनाको निष्पक्ष छानबिनका लागि सक्षम न्यायिक आयोग गठन गर्न तथा दोषीलाई कानुनी दायरामा ल्याउन माग गरेको एमालेका प्रचार विभाग प्रमुख निरज आचार्यले जानकारी दिनुभयो।
संविधान, सङ्घीयता र संवैधानिक संस्थाको संरक्षणमा जोड दिँदै प्रदेश खारेजी, संवैधानिक निकायमाथिको हस्तक्षेप तथा राज्यका संस्थाको राजनीतिक परिचालनप्रति आपत्ति जनाइएको छ। जन-जीविकातर्फ महँगी नियन्त्रण, घरायसी विद्युत् कर फिर्ता, सुकुम्बासी व्यवस्थापन, व्यावसायिक वातावरण निर्माण तथा तोडफोड र आगजनीमा संलग्नलाई कारबाही गर्न माग गरिएको छ।
छिमेकीसँगको सम्बन्ध सार्वभौम समानतामा आधारित हुनुपर्ने उल्लेख गर्दै प्रधानमन्त्रीको आसन्न भारत भ्रमणमा सीमा समस्या, असमान सन्धि, इपिजी प्रतिवेदन, व्यापार घाटा, हवाई प्रवेश बिन्दु र रोकिएका परियोजनामा स्पष्ट धारणा राख्न आग्रह गरिएको छ।
भोटेकोशी बाढी-पीडितको तत्काल पुनःस्थापना, राहत, क्षतिग्रस्त पुल–सडक मर्मत र वैज्ञानिक अध्ययनका आधारमा बस्ती पुनर्निर्माण गर्न माग गर्दै बाढी प्रभावित बाल-बालिका, गर्भवती/सुत्केरी, ज्येष्ठ नागरिक र अपाङ्गता भएका व्यक्तिका समस्या प्राथमिकताका साथ सम्बोधन गर्न जोड दिइएको छ। जलवायु न्यायका लागि अन्तरराष्ट्रिय मञ्चमा प्रभावकारी कूटनीति, सडक सुरक्षा सुधार, प्रवासी नेपालीका सरोकार सम्बोधन तथा खाडी क्षेत्रमा कार्यरत नेपाली श्रमिकको सुरक्षा सुनिश्चित गर्न समेत सरकारको ध्यानाकर्षण गराइएको छ।
पार्टीको आन्तरिक जीवनमा सुधार, शुद्धीकरण र सुदृढीकरणलाई प्राथमिकता दिँदै वैचारिक, संगठनात्मक र भावनात्मक एकता, युवा पुस्तासँगको सहकार्य, विलासी जीवनशैली र भ्रष्टाचारप्रति निर्मम हुने तथा गुटबन्दी अन्त्य गर्ने संकल्प गरिएको छ।
भेलामा अध्यक्ष केपी शर्मा ओली, वरिष्ठ नेता विद्यादेवी भण्डारी, उपाध्यक्ष रामबहादुर थापा, उपाध्यक्ष विष्णु पौडेल र महासचिव शंकर पोखरेलले विभिन्न विषयमा सम्बोधन तथा कार्यपत्र प्रस्तुत गर्नुभएको थियो।
| विवरण | तथ्य / जानकारी |
| निर्णय | २१ बुँदे समसामयिक विशेष प्रस्ताव र संकल्प पारित (निर्वाचन पूर्वतयारी तथा आवश्यक परे आन्दोलनको तयारी) |
| सहभागिता | देशभर र प्रवासबाट ३,४१४ प्रतिनिधि |
| प्रमुख माग तथा सरोकार | भदौ २३–२४ घटनाको न्यायिक छानबिन, संविधान/सङ्घीयता संरक्षण, महँगी/विद्युत् कर नियन्त्रण, भारत भ्रमणका एजेन्डा, भोटेकोशी बाढी पुनःस्थापना |
| आन्तरिक प्रतिबद्धता | पार्टी शुद्धीकरण र सुदृढीकरण, युवा सहभागिता, भ्रष्टाचारप्रति निर्ममता, गुटबन्दी अन्त्य |
| प्रमुख वक्ता | केपी शर्मा ओली, विद्यादेवी भण्डारी, रामबहादुर थापा, विष्णु पौडेल, शंकर पोखरेल (प्रचार प्रमुख: निरज आचार्य) |
What if you could work from Anywhere?
Explore More with something that can change your Life!














प्रतिक्रिया दिनुहोस्