सरकारको कार्यसूची र वाचापत्र अनुसार नै बजेट आउँछ : अर्थमन्त्री वाग्ले

काठमाडौँ, वैशाख ३० गते । अर्थमन्त्री डा. स्वर्णिम वाग्लेले सरकारको कार्यसूची र वाचापत्र अनुसार नीति तथा कार्यक्रम आएको र त्यसअनुरूप नै बजेट आउने बताएका छन् । कान्तिपुर इकोनमिक समिटमा भर्चुअल सम्बोधन गर्दै अर्थमन्त्री वाग्लेले अब सुशासनको लाभांश लिने बेला आएको समेत बताए ।

अर्थमन्त्री वाग्लेले भने, ‘कु-शासनको मूल्य हामीले चुकायौँ, अब सु-शासनको लाभांश लिने बेला आएको छ ।‘ उनले आगामी बजेट ई-गभर्नेन्स, डिजिटल डेलिभरी र डिजिटल अर्थतन्त्रका अवधारणामा रहेर आउनेसमेत बताए । डिजिटल मार्फत सेवा डेलिभरीलाई प्रभावकारी बनाउनेमा उनले जोड दिए । डेटा सेन्टरका लागि नेपालको वातावरणीय अवस्था निकै उपयुक्त रहेको विभिन्न अन्तर्राष्ट्रिय अध्ययनले समेत देखाएको उनले जनाए ।

सूचना तथा प्रविधि क्षेत्रको सबै काम प्रधानमन्त्री कार्यालयबाटै हुने उनले बताए । आयातमा आधारित अर्थतन्त्रको पुनर्संरचना गरिनेसमेत उनले बताए । मध्यम वर्गलाई पर्ने करका बोझहरू घटाउने पनि उनले बताए ।