हलमा चहलपहल: एकैसाथ प्रदर्शनमा आए नेपाली र विदेशी गरी नयाँ चार चलचित्र

काठमाडौँ, भदौ २७ गते । रसुवाको बाढीका कारण केही समय सुस्ताएको चलचित्र क्षेत्रमा यो हप्ताबाट पुनः चहलपहल सुरु भएको छ। यो शुक्रबारदेखि हलहरूमा दुई नेपाली र दुई अन्तर्राष्ट्रिय गरी कुल चार नयाँ चलचित्र एकैसाथ प्रदर्शनमा आएका छन्।

नेपाली चलचित्र ‘पेन्सन पट्टा’ र ‘बेहुली’ का साथै हलिउडको ‘फल २ : डेड प्वाइन्ट’ र बलिउडको ‘हनुमान अंश’ ले दर्शकलाई हलसम्म आकर्षित गर्ने अपेक्षा गरिएको छ।

प्रदर्शनमा आएका नेपाली चलचित्रहरूमध्ये दयाहाङ राई र गौमाया गुरुङ अभिनित तथा माओत्से गुरुङ निर्देशित ‘पेन्सन पट्टा’ लाहुरे श्रीमान्को निधनपछि पत्नीले पेन्सन प्राप्त गर्न गर्ने सामाजिक सङ्घर्षमा आधारित छ। त्यसैगरी, पारस बम ठकुरी र दिव्या रायमाझीको मुख्य भूमिका रहेको सशान कँडेल ‘सन्तोष’ निर्देशित ‘बेहुली’ ड्रामा विधामा तयार पारिएको सिनेमा हो।

अन्तर्राष्ट्रिय चलचित्रतर्फ थाइल्यान्डको जोखिमपूर्ण माउन्ट क्वान आरोहण र बचावटको सस्पेन्स कथामा बनेको हलिउड सिनेमा ‘फल २ : डेड प्वाइन्ट’ प्रदर्शनमा आएको छ।

साथै, नीम करोली बाबाको बाल्यकाल र आध्यात्मिक यात्राको प्रेरणादायी कथा प्रस्तुत गरिएको बलिउड चलचित्र ‘हनुमान अंश’ ले पनि शुक्रबारदेखि नेपाली दर्शक माझ उपस्थिति जनाएको छ।