देशभर मनसुनको व्यापक प्रभाव : वर्षा र हिमपातको चेतावनी, सतर्कता अपनाउन महाशाखाको अपिल

काठमाडौँ, भदौ ६ गते । काठमाडौँसहित देशभर मनसुनी वायुको प्रभाव सक्रिय रहेकाले अधिकांश स्थानमा सामान्य बदली भएको छ। जल तथा मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानको आसपास रहेकाले कोशी, बागमती, गण्डकी र लुम्बिनी प्रदेशका विभिन्न स्थानहरूमा मेघगर्जन र चट्याङसहित वर्षा भइरहेको छ।

शनिबार दिउँसो तथा राति देशभर सामान्यतया बदली रहनेछ। हिमाली तथा पहाडी भूभागमा मध्यम वर्षाका साथै उच्च हिमाली क्षेत्रमा हिमपातको सम्भावना रहेको छ। साथै मधेस प्रदेश, बागमती, गण्डकी, सुदूरपश्चिम, कोशी र लुम्बिनीका तराई भेगमा पनि चट्याङसहित हल्कादेखि मध्यम वर्षाको सम्भावना दर्शाइएको छ।

कोशी, बागमती, गण्डकी र लुम्बिनीका पहाडी तथा तराईका एक-दुई स्थानमा भारी वर्षाको जोखिम रहेको छ। भारी वर्षाका कारण बाढी, पहिरो, भूक्षय र गेग्रान बहावको खतरा हुनसक्ने भएकाले कृषि, स्वास्थ्य, पर्यटन, सडक तथा हवाई यातायातमा सतर्कता अपनाउन र मौसमसम्बन्धी ताजा सूचनामा अद्यावधिक रहन महाशाखाले आग्रह गरेको छ।