निर्माण व्यवसायी महासङ्घको सुझावअनुसार सार्वजनिक खरिद ऐनको दोस्रो संशोधन: मन्त्री सुनिल लम्साल

काठमाडौँ, असोज १९ गते । पूर्वाधार विकासमन्त्री सुनिल लम्सालले नेपाल निर्माण व्यवसायी महासङ्घको सुझाव अनुरूप नै सार्वजनिक खरिद ऐनको दोस्रो संशोधन गरिएको बताउनुभएको छ।

लगानी र विकासका लागि कानुन सुधार परामर्श कार्यशालाको समापन समारोहमा मन्त्री लम्सालले महासङ्घको वर्तमान कार्यसमितिले दिएका महत्त्वपूर्ण सुझावहरूप्रति धन्यवाद दिँदै वर्तमान सरकारले सरोकारवाला पक्षहरूसँगै बसेर नीति नियम तर्जुमा गर्ने रणनीति अघि सारेको जानकारी दिनुभयो।

कार्यक्रममा कानुन, न्याय तथा संसदीय मामिलामन्त्री सोविता गौतमले निजी क्षेत्रबाट प्राप्त सुझावहरूलाई सरकारले महत्त्वपूर्ण दस्तावेजको रूपमा लिएको र सोही अनुसार कार्यान्वयन गरिने प्रतिबद्धता जनाउनुभयो।

पूर्वाधार विकास मन्त्रालयका सहसचिव एवम् निर्माण व्यवसाय प्रवर्द्धन तथा व्यवस्थापन कार्यान्वयन समितिका अध्यक्ष कृष्णराज पन्तका अनुसार प्राप्त सुझावहरूलाई राष्ट्रिय योजना आयोगको संयोजकतत्वमा रहेको समितिमार्फत थप परिमार्जन र परिष्कृत गरिनेछ।

नेपाल उद्योग वाणिज्य महासङ्घका निवर्तमान अध्यक्ष चन्द्र ढकालले निजी क्षेत्र र सरकारको सहकार्यबाट मात्रै आर्थिक समृद्धि सम्भव हुने बताउनुभयो। यस्तै, नेपाल निर्माण व्यवसायी महासङ्घका वरिष्ठ उपाध्यक्ष रामजी पन्तले वर्तमान सरकार निजी क्षेत्रमैत्री रहेको र नेपाल उद्योग परिसङ्घका उपाध्यक्ष हेमराज ढकालले निजी क्षेत्रका सुझावहरू प्रभावकारी रूपमा कार्यान्वयन हुने विश्वास व्यक्त गर्नुभयो।

प्रधानमन्त्रीका नीति, प्रशासन तथा सुशासन सल्लाहकार सुदीप ढकालको अध्यक्षतातमा सम्पन्न उक्त कार्यशालामा संसदीय समितिका सभापति, विभिन्न मन्त्रालयका प्रतिनिधि, विषयगत विज्ञ र निजी क्षेत्रका नेतृत्वकर्ताहरूको सहभागिता थियो।

कार्यशालामा विकास निर्माणका कानुनी तथा प्रक्रियागत जटिलताहरू फुकाउँदै लगानीमैत्री वातावरण निर्माण गर्ने रणनीतिमाझ विस्तृत छलफल भएको थियो।