मर्मत-सम्भारका लागि मनकामना केबलकार सेवा आज मङ्गलबार बन्द: बुधबारदेखि पुनः सञ्चालन हुने

गोरखा, असोज २० गते । प्रसिद्ध धार्मिकस्थल मनकामना मन्दिर जाने प्रमुख यातायातको माध्यम मानिने मनकामना केबलकारको सेवा आज मङ्गलबार (असोज २० गते) एक दिनका लागि पूर्ण रूपमा बन्द गरिएको छ।

मनकामना दर्शन प्रा.लि.ले एक सार्वजनिक सूचना जारी गर्दै नियमित मर्मत-सम्भार, प्राविधिक परीक्षण तथा सरसफाइका लागि सेवा स्थगित गरिएको जनाएको हो।

कम्पनीका अनुसार केबलकारका टावर लगायतका प्राविधिक संरचनाहरूको नियमित मर्मत र सरसफाइ गरी यात्रालाई थप सुरक्षित र व्यवस्थित बनाउन यो कदम चालिएको हो। केबलकार सेवा बन्द रहने भएकाले असोज २० गते दर्शनका लागि आउने भक्तजन तथा यात्रुहरूलाई वैकल्पिक सडक वा पैदल मार्ग प्रयोग गर्न आग्रह गरिएको छ।

मनकामना दर्शन प्रा.लि.का प्रबन्धक उज्ज्वल शेरचनले मर्मत-सम्भारको कार्य सम्पन्न गरी असोज २१ गते बुधबार बिहानदेखि केबलकार सेवा साविककै समय-तालिका अनुसार नियमित रूपमा सञ्चालनमा आउने जानकारी दिनुभयो। सेवा अवरुद्ध हुँदा यात्रु तथा भक्तजनहरूमा पर्न गएको असुविधाप्रति कम्पनीले क्षमायाचना व्यक्त गरेको छ।