संवेदनशील सूचना चुहावटको आरोपमा सशस्त्र प्रहरीका एआईजी दाहाल निलम्बित: तीन दिनभित्र स्पष्टीकरण पेस गर्न आदेश

काठमाडौँ, असोज २० गते । गृह मन्त्रालयले सुरक्षासँग सम्बन्धित संवेदनशील सूचना चुहावट गरी पदीय आचरणविपरीत कार्य गरेको आरोपमा सशस्त्र प्रहरी बल, नेपालका अतिरिक्त महानिरीक्षक (एआईजी) बंशीप्रसाद दाहाललाई निलम्बन गरेको छ।

मन्त्रालयले सोमबार विज्ञप्ति जारी गर्दै दाहाललाई निलम्बन गरी उहाँमाथि लागेको अभियोगको जाँचबुझका लागि छानबिन अधिकृतसमेत तोकेको छ।

गृह मन्त्रालयका सहसचिव एवम् प्रवक्ता आनन्द काफ्लेले दाहालमाथि कारबाहीका लागि सिफारिस प्राप्त भएपछि असोज १९ गतेको मन्त्रिस्तरीय निर्णयानुसार उक्त निलम्बन तथा कारबाही प्रक्रिया अघि बढाइएको जानकारी दिनुभयो। मन्त्रालयले एआईजी दाहाललाई आफूमाथि लागेको आरोपका सम्बन्धमा स्पष्टीकरण पेस गर्न तीन दिनको म्याद दिएको छ।

गृह मन्त्रालयद्वारा जारी विज्ञप्तिअनुसार हरेक सुरक्षाकर्मीले पद अनुसारको आचरण पालना र गोपनीयता कायम राख्नुपर्ने कानुनी व्यवस्थाविपरीत कार्य भएकाले सूक्ष्म निगरानी र विश्लेषणपछि यो कदम चालिएको हो।

मन्त्रालयले पदीय आचरणविपरीतका कार्य, गोप्य सूचना चुहावट तथा शान्ति सुरक्षामा प्रतिकूल असर पार्ने गतिविधिमा संलग्न जोसुकैलाई कानुनबमोजिम कडा कारबाही गरिने प्रतिबद्धतासमेत व्यक्त गरेको छ।