पश्चिमी भूभागबाट बाहिरिन थाल्यो यो वर्षको मनसुन: दसैँमा मौसम सफा रहने, ठुलो वर्षा र बाढीको जोखिम नरहने

काठमाडौँ, असोज १९ गते । नेपाल मौसम विज्ञान विभागका अनुसार यो वर्षको मनसुनी वायु कमजोर हुँदै गएको छ र गत असोज १७ गते (अक्टोबर ३) देखि नेपालको पश्चिमी भूभागबाट मनसुन बाहिरिन (Withdraw) सुरु भएको छ।

सामान्यतया जुन १३ मा प्रवेश गरी अक्टोबर २ मा बाहिरिने मनसुन यस वर्ष जुन १९ मा (करिब ६ दिन ढिला) नेपाल प्रवेश गरेको थियो। प्रशान्त महासागरमा विकसित ‘एल निनो‘ (El Niño) को प्रभावका कारण मनसुनको आगमनमा ढिलाइ भएको मौसमविद्हरूले बताएका छन्।

विभागका प्रवक्ता एवम् मौसमविद् विभूति पोखरेलका अनुसार सुरुमा एल निनो प्रभावका कारण सरदरभन्दा कम वर्षा हुने अनुमान गरिए पनि मनसुनको अन्तिमतिर बङ्गालको खाडीमा विकसित ‘डिप्रसन‘ प्रणालीका कारण असोज ९ देखि ११ गतेसम्म देशका धेरैजसो पहाडी तथा अन्य भूभागमा भारी वर्षा, बाढी र पहिरोको सामना गर्नुपरेको थियो। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार असोज ९ देखि १२ गतेसम्म बाढी-पहिरो र अविरल वर्षाका सयौँ घटनाहरू दर्ता भएका थिए।

सुदूरपश्चिम, कर्णाली, लुम्बिनी र गण्डकीका केही भूभागबाट मनसुन बाहिरिसकेको छ भने बाँकी भूभागबाट पनि आगामी केही दिनभित्रै मनसुन पूर्ण रूपमा बाहिरिने सम्भावना रहेको छ। आगामी बडादसैँसम्म नेपालबाट मनसुन पूर्ण रूपमा बाहिरिने भएकाले पर्वको समयमा मौसम मुख्यतया सफा रहने र ठुलो वर्षाको कुनै सम्भावना नरहेको मौसमविद् पोखरेलले जानकारी दिनुभयो।

यसैगरी, जल विज्ञान तथा जलस्रोत अनुसन्धान केन्द्र बाढी पूर्वानुमान महाशाखाका जलविद् प्रभाकर यादवले मनसुन बाहिरिँदै गएकाले ठुलो वर्षा नहुने र नदीहरूको जलसतह ह्वात्तै बढ्ने वा बाढीको जोखिम नरहेको बताउनुभयो। फाट्टफुट्ट वर्षाको सम्भावना भए पनि विपद् नै निम्त्याउने खालको मौसमी जोखिम अब नरहेको महाशाखाले जनाएको छ।

मनसुन तथा मौसम पूर्वानुमान सम्बन्धी मुख्य विवरण