नेपाली कांग्रेसको १५ औँ महाधिवेशन: अन्तिम मतदाता नामावली सार्वजनिक, कुल ७,११४ प्रतिनिधिले मतदान गर्ने

काठमाडौँ, असोज २० गते । नेपाली कांग्रेसको १५ औँ महाधिवेशन अन्तर्गत नयाँ नेतृत्व चयनका लागि भाग लिने महाधिवेशन प्रतिनिधिहरूको अन्तिम नामावली प्रकाशन गरिएको छ।

केन्द्रीय निर्वाचन समितिका सदस्य सचिव राजु कटुवालका अनुसार संशोधित नामावली अनुसार यस पटक महाधिवेशनमा भाग लिने मतदाता (महाधिवेशन प्रतिनिधि) को कुल सङ्ख्या सात हजार ११४ पुगेको छ।

निर्वाचन समितिले मङ्गलबार बिहान मतदाता नामावली प्रकाशन, दाबी-विरोध तथा जाँचबुझका कार्यक्रम तय गर्दै दिउँसो १२:३० देखि ४ बजेसम्म उम्मेदवारको मनोनयनपत्र दर्ता गर्ने कार्यतालिका सार्वजनिक गरेको छ। पार्टीको बन्दसत्रले पारित गरेको संशोधित विधान अनुसार अब बन्ने २९७ सदस्यीय नयाँ केन्द्रीय कार्यसमितिका लागि यही नयाँ व्यवस्था अनुसार निर्वाचन प्रक्रिया अघि बढाइनेछ।

यसैबीच, महाधिवेशनलाई सुव्यवस्थित बनाउन २०० भन्दा बढी स्वयंसेवकहरू परिचालन गरिएको छ। कांग्रेस केन्द्रीय सदस्य एवम् स्वयंसेवक व्यवस्थापन समितिका संयोजक गणेश लामाले महाधिवेशनमा भाग लिन आएका देश तथा विदेशका प्रतिनिधिहरूको सहजताका लागि बन्दसत्र तथा निर्वाचन हुने स्थलहरूमा स्वयंसेवकहरू खटाइएको जानकारी दिनुभयो।

गत आइतबारदेखि काठमाडौँमा सुरु भएको महाधिवेशन अन्तर्गत असोज २० र २१ गते बन्दसत्र तथा असोज २१ र २२ गते मतदान गर्ने कार्यतालिका रहेको छ। बन्दसत्रमा पार्टीका पदाधिकारीहरूले प्रस्तुत गर्नुभएका साङ्गठनिक, राजनीतिक तथा आर्थिक प्रतिवेदनहरूमाथि छलफल भइरहेको छ।

महाधिवेशन तथा निर्वाचन कार्यतालिका