देशका विभिन्न भागमा राति भारीदेखि धेरै भारी वर्षाको सम्भावना

काठमाडौँ, साउन ३१ गते। जल तथा मौसम विज्ञान विभाग, मौसम पूर्वानुमान महाशाखाका अनुसार आज राति हिमाली भूभागका केही स्थानमा मेघगर्जन र चट्याङ्गसहित मध्यम वर्षाको सम्भावना छ। हाल बागमती, गण्डकी र लुम्बिनीका केही तथा अन्य प्रदेशका थोरै स्थानमा वर्षा भइरहेको छ। आज राति गण्डकी, लुम्बिनी, कर्णाली र सुदूरपश्चिमका धेरैजसो पहाडी भूभागका साथै सुदूरपश्चिमका तराईका एक–दुई स्थानमा धेरै भारी वर्षा हुनसक्ने अनुमान छ।

सोमबार पनि गण्डकी, लुम्बिनी, कर्णाली र सुदूरपश्चिमका पहाडी क्षेत्र तथा लुम्बिनी र सुदूरपश्चिमका तराई भूभागका केही स्थानमा भारी वर्षाको सम्भावना रहेको छ। विशेषगरी लुम्बिनी प्रदेशका तराई भूभागका एक-दुई स्थानमा धेरै भारी वर्षा हुनसक्ने भएकाले आवश्यक सतर्कता अपनाउन महाशाखाले आग्रह गरेको छ।

यसैगरी मङ्गलबार कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भूभागका एक-दुई स्थानमा भारी वर्षाको सम्भावना रहेको छ। मौसममा आउने परिवर्तनका कारण नदीमा जलसतह बढ्ने र पहिरोको जोखिम रहने हुँदा हिमाली तथा पहाडी क्षेत्रका बासिन्दालाई पूर्वसावधानी अपनाउन महाशाखाले सचेत गराएको छ।