भोटेकोशी बाढी: बागलुङका १६ जना अझै बेपत्ता, आफन्तहरू फर्किने आशामा

बागलुङ, भदौ २१ गते । भदौ १० गते भोटेकोशी नदीमा आएको विनाशकारी हिमबाढीमा परेर बागलुङका १६ जना अझै बेपत्ता रहेका छन्।

रसुवास्थित त्रिशूली हाइड्रोपावर र हाकुबेंसीमा मजदुरी गर्न गएका तमानखोला गाउँपालिकाका ९ जना, ढोरपाटन नगरपालिकाका २ जना, गलकोट नगरपालिकाका १ जना तथा नुवाकोटको त्रिशूली–३ ‘बी’ जलविद्युत् आयोजनामा कार्यरत बागलुङ नगरपालिकाका दुई इन्जिनियर दम्पती र उहाँहरूका दुई बाल-बालिकासहित १६ जनाको अवस्था अज्ञात रहेको हो।

बेपत्ता हुनेमा अधिकांश परिवारका मुख्य आम्दानीकर्ता रहेकाले आश्रित परिवारको दैनिकी थप संकटमा परेको छ। तमानखोला गाउँपालिकाका अध्यक्ष जोकलाल बुढा र वडाध्यक्षहरूसहितको टोली आफ्ना नागरिकको खोजीका लागि भोटेकोशी क्षेत्रमै पुगेर निरन्तर उद्धार तथा खोजी कार्यमा खटिएको छ।

खोजी कार्य ११औँ दिनसम्म जारी रहँदा आशा झिनो बन्दै गए पनि आफन्तहरू अझै आफ्ना प्रियजन सकुशल फर्किने प्रतीक्षामा बाटो कुरिरहेका छन्।