बागलुङमा डेंगु सङ्क्रमितको सङ्ख्या एक हजार नाघ्यो : देशभरमै सबैभन्दा धेरै, ‘खोज र नष्ट गर’ अभियान तीव्र

बागलुङ, भदौ १९ गते । डेंगु सङ्क्रमणको केन्द्र बनेको बागलुङ जिल्लामा साउन १ गतेयता सङ्क्रमितको सङ्ख्या १ हजार ११ पुगेको छ, जुन देशभरका जिल्लाहरूमध्ये सबैभन्दा बढी हो।

निरन्तरको वर्षा र सरसफाइमा भएको बेवास्ताका कारण डेंगु तीव्र रूपमा फैलिएको जनस्वास्थ्य कार्यालयले जनाएको छ। कुल सङ्क्रमितमध्ये बागलुङ नगरपालिकामा मात्रै ६ सय ४४ जना भेटिएका छन् भने जैमिनी, गलकोट, ढोरपाटन, काठेखोला लगायतका पालिका र अन्य जिल्लाका मानिसमा पनि सङ्क्रमण पुष्टि भएको छ।

धौलागिरि प्रादेशिक अस्पतालमा मात्रै ८५३ जनामा सङ्क्रमण पुष्टि भइसकेको छ। अस्पतालका मेडिकल सुपरीटेन्डेन्ट डा. किरण तिवारीका अनुसार डेंगु महामारीका रूपमा फैलिएकाले परीक्षणको दायरा बढाउन थप किटको व्यवस्था गरिँदैछ। अस्पतालमा जनशक्ति अभाव भएपछि बागलुङ नगरपालिकाले प्राविधिक खटाएर परीक्षण कार्यलाई निरन्तरता दिएको छ।

(नोट: धौलागिरि प्रादेशिक अस्पतालमा मात्रै ८५३ जनामा सङ्क्रमण पुष्टि भइसकेको छ भने कतिपय स्वास्थ्य चौकी र मेडिकल पसलहरूको तथ्याङ्क यसमा समेटिन बाँकी छ।)

डेंगुको सङ्क्रमण अप्रत्याशित रूपमा बढेपछि जिल्लाभर ‘खोज र नष्ट गर’ अभियानका साथै जनसचेतना कार्यक्रमहरू सञ्चालन गरिएका छन्। विशेष गरी ग्यारेज, टायर पसल तथा पानी जम्ने ठाउँहरूमा लामखुट्टेको बासस्थान नष्ट गर्न र व्यक्तिगत सरसफाइमा ध्यान दिन सर्वसाधारणलाई आग्रह गरिएको छ। ज्वरो आउने, टाउको दुख्ने, र कम्पन आउनेजस्ता लक्षण देखिएमा तुरुन्त परीक्षण गराउन चिकित्सकले आग्रह गरेका छन्।