प्रधानमन्त्री राहत कोषमा ६ अर्ब ३६ करोडभन्दा बढी जम्मा, पारदर्शी रूपमा सहयोग विवरण सार्वजनिक

काठमाडौँ, भदौ १६ गते । बाढी तथा प्राकृतिक विपत्तिबाट प्रभावित नागरिकहरूका लागि स्वदेश तथा विदेशबाट आर्थिक सहयोग जुट्ने क्रम तीव्र बनेको छ। प्रधानमन्त्री तथा मन्त्रिपरिषद् कार्यालयका अनुसार सोमबार साँझसम्म प्रधानमन्त्री राहत कोषका ९ वटा वाणिज्य बैंक खाताहरूमा कुल ६ अर्ब ३६ करोड ६५ लाख ५१ हजार २२७ रूपैयाँ जम्मा भएको छ।

प्राप्त रकममध्ये १ अर्ब रूपैयाँ बाढी प्रभावित क्षेत्रमा उद्धार तथा राहतका लागि निकासा गरिसकिएको छ भने बाँकी ५ अर्ब ३६ करोड ६५ लाख रूपैयाँभन्दा बढी रकम कोषमा मौज्दात रहेको छ। यसका साथै, हिमालयन र लक्ष्मी बैंकका खाताहरूमा ६१ लाख ११ हजार अमेरिकी डलरभन्दा बढी सहयोग प्राप्त भएको छ भने विभिन्न देश तथा संघ-संस्थाहरूबाट सहयोगको प्रतिबद्धता आउने क्रम जारी छ।

प्रधानमन्त्री तथा मन्त्रिपरिषद्को कार्यालयले ‘उद्धार अनुरोध पोर्टल’ मार्फत प्राप्त सहयोग रकम र खर्चको विवरण पारदर्शी रूपमा सार्वजनिक गर्दै आएको छ। प्रधानमन्त्री दैवी प्रकोप कोष र प्रधानमन्त्री कोषमार्फत संकलन भइरहेको यो रकमलाई प्रभावकारी रूपमा प्रभावितहरूको उद्धार, राहत तथा पुनःस्थापनामा उपयोग गरिने सरकारले जनाएको छ।