नेपाल वैदेशिक रोजगार व्यवसायी संघको कार्यसमिति विघटन

काठमाडौं, जेठ १८ गते । जिल्ला प्रशासन कार्यालय, काठमाडौंले भुवनसिंह गुरुङ नेतृत्वको नेपाल वैदेशिक रोजगार व्यवसायी संघको कार्यसमिति विघटन गर्दै संघको प्रबन्ध समितिलाई विशेष साधारण सभा गर्न निर्देशन दिएको छ । प्रशासनको निर्देशनात्मक पत्रले जेठ २४ गते गर्ने भनिएको विशेष साधारण सभाको लागि बाटो खुलेको छ ।

प्रशासनले संघको कार्यसमितिका दुई तिहाइ पदाधिकारीले राजीनामा दिएपछि विधानबमोजिम कार्यसमिति स्वतः विघटन भएको पत्र संघलाई पठाएको हो । ‘राजीनामा गर्ने पदाधिकारीको संख्या दुई तिहाई हुन आएको देखिएको हुँदा संघको विधानको दफा २६ को ४ (ख) को व्यवस्थाबमोजिम संघको वर्तमान कार्यसमिति स्वतः विघटन भएको छ,’ सोमबार जिल्ला प्रशासनले संघलाई पठाएको पत्रमा भनिएको छ, ‘अतः त्यहाँ संघको विधानमा नै व्यवस्था भए बमोजिम दफा २६ को ४ (ख) को प्रबन्ध समितिको गठन गर्ने कार्य सल्लाहकार समितिको निर्णयबाट भएकोमा उक्त कार्य विधानतः मिलेकै देखिन्छ ।’

प्रशासनले प्रबन्ध समितिलाई तीनबुँदे निर्देशन जारी गरेको छ । जसमा संघको विधानको दफा २६ को ४ (ख) व्यवस्था कार्यान्वयन गर्नेगरी विशेष साधारण सभा आह्वान गर्न, यसअगाडि नै प्रक्रिया सुरु भइसकेको अवस्थामा विधानअनुसार कार्यहरू निरन्तर अघि बढाउन र प्रबन्ध समितिले गर्ने सबै कार्य, निर्णय तथा सम्बद्ध विषयमा जिल्ला प्रशासन कार्यालयलाई लिखित रूपमा अध्यावधिक जानकारी दिने विषय उल्लेख छ ।

जिल्ला प्रशासन कार्यालयले कार्यप्रक्रियामा कसैले बाधा व्यवधान नगर्न निर्देशन पनि दिएको छ । ‘यी कार्यप्रक्रियामा कोही कसैले बाधा व्यवधान सृजना नगर्नु नगराउनु,’ पत्रमा भनिएको छ, ‘निर्देशनविपरीत कार्य गरेको पाइए तत्काल जिल्ला प्रशासन कार्यालयलाई सूचना दिन हुन जानकारी गराइन्छ ।’

प्रशासनले यसको जानकारी युवा, श्रम तथा रोजगार मन्त्रालयलाई दिएको छ । प्रबन्ध समितिमा पूर्वअध्यक्षद्धय राजेन्द्र भण्डारी, विमल ढकाल, व्यवसायीहरू जनक रावल, धनलाल जैशी, मधुकर रिजाल, विनोदजंग केशी र सोमबहादुर तामाङ रहेका छन् ।