अत्यावश्यक वस्तु र ग्यासको अभाव नहुने साल्ट ट्रेडिङको दाबी: सात महिनालाई पुग्ने नुन मौज्दात, कालोबजारी रोक्न १० समिति परिचालन

काठमाडौँ, भदौ १८ गते । मुख्य राजमार्गमा पहिरो गई सडक अवरुद्ध भए पनि बजारमा नुन, चामल, चिनी तथा खाना पकाउने ग्यासको अभाव हुन नदिइने साल्ट ट्रेडिङ कर्पोरेसनले जनाएको छ।

हेटौँडा र दक्षिणकालीतर्फका वैकल्पिक मार्ग प्रयोग गरी सामान आपूर्ति भइरहेको र रोकिएका ग्यास बुलेटहरूलाई तराईका प्लान्टमा डाइभर्ट गरी सिलिन्डर भरेर काठमाडौँ ल्याउने व्यवस्था मिलाइएको छ। कर्पोरेसनसँग करिब सात महिनालाई पुग्ने आयोडिनयुक्त नुनको मौज्दात रहेकाले अत्तालिएर आवश्यकताभन्दा बढी सामान सञ्चय नगर्न उपभोक्तालाई आग्रह गरिएको छ।

ग्यास वितरणलाई व्यवस्थित बनाउन कर्पोरेसनले टोकन प्रणाली लागू गरेको छ। विपद्को बहानामा बजारमा कृत्रिम अभाव, कालोबजारी तथा अनुचित मूल्यवृद्धि हुन नदिन सरकार र कर्पोरेसनले १० वटा अनुगमन समिति परिचालन गरी बजारको नियमित निगरानी थालेका छन्। उता उपभोक्ता अधिकारकर्मीहरूले भने आपूर्ति सहज रहेको सरकारी दाबीबिच वास्तविक अवस्था पारदर्शी हुनुपर्ने र अनुगमनलाई थप प्रभावकारी बनाउनुपर्नेमा जोड दिएका छन्।

यसैबिच, साल्ट ट्रेडिङले नजिकिँदै गरेको दसैँ, तिहार तथा छठ पर्वलाई लक्षित गरी सहुलियत मूल्य पसल सञ्चालनको तयारीसमेत अघि बढाएको छ। दसैँ सुरु हुनुभन्दा १५ दिनअघिदेखि काठमाडौँ उपत्यकाका १४ देखि १५ स्थानसहित देशका विभिन्न भागमा सहुलियत पसल खोलिनेछ। ती पसलहरूमार्फत नुन, चिनी, चामल, दाल र तेललगायतका दैनिक उपभोग्य वस्तुहरूमा छुट दिएर बिक्री वितरण गर्ने कर्पोरेसनको तयारी छ।