भोटेकोशी बाढी : सप्तरीका १२ इन्जिनियरसहित ४८ जना अझै सम्पर्कविहीन, परिवारमा चिन्ता

राजविराज, भदौ १८ गते । भोटेकोशी क्षेत्रमा आएको भीषण बाढीपहिरिपछि रोजगारीका क्रममा रसुवा र नुवाकोटका जलविद्युत् तथा पूर्वाधार आयोजनामा पुगेका सप्तरीका १२ जना इन्जिनियरसहित ४८ जना नागरिक अझै सम्पर्कविहीन छन्। जिल्ला प्रशासन कार्यालय सप्तरीका अनुसार बाढीपहिरोपछि सम्पर्कविहीन भएका कुल ५२ जनामध्ये तीन जना सम्पर्कमा आएका छन् भने नुवाकोट हाइड्रोपावरमा कार्यरत खडक नगरपालिकाका सन्तोष चौधरीको शव फेला परेको छ।

सम्पर्कविहीन हुनेहरूमा इन्जिनियरहरूसँगै ३१ जना कामदार, ओभरसियर, सवारी चालक, शिक्षक, स्वास्थ्यकर्मी र सुरक्षाकर्मी रहेका छन्। प्राविधिक तथा मजदुर जनशक्ति ठुलो संख्यामा एकैपटक विपद्को चपेटामा परेपछि सप्तरीका सम्बन्धित परिवारजनमा चिन्ता र त्रास बढेको छ। जिल्ला प्रशासन कार्यालय तथा प्रहरी प्रशासनले सम्पर्कविहीनहरूको विवरण निरन्तर अद्यावधिक गर्दै खोजी कार्य जारी राखेको छ।

कठिन र भौगोलिक रूपमा जोखिमयुक्त क्षेत्रमा सञ्चालित ठुला पूर्वाधार आयोजनाहरूमा कार्यरत जनशक्तिको सुरक्षालाई उच्च प्राथमिकता दिनुपर्ने आवश्यकता यस घटनाले औँल्याएको छ। पीडित परिवार तथा स्थानीयहरूले उद्धार र खोजी कार्यलाई थप तीव्र बनाउनका साथै आफन्तको अवस्थाबारे नियमित र विश्वसनीय सूचना उपलब्ध गराउन सरकारसँग माग गरेका छन्।