दसैँका लागि आन्तरिक हवाई टिकट बुकिङ ह्वात्तै बढ्यो: सस्तो टिकट सकिए, प्रमुख गन्तव्यका उडान भरिभराउ

काठमाडौँ, असोज २१ गते । दसैँ आउन दुई साता बाँकी रहँदा काठमाडौँबाट बाहिरिने अधिकांश आन्तरिक हवाई उडानको टिकट बुकिङमा तीव्र वृद्धि भएको छ। हालैको बाढीपहिरोका कारण प्रमुख राजमार्गहरू क्षतिग्रस्त भई सडकमार्ग अनिश्चित बनेपछि यात्रुहरू हवाईयात्रातर्फ आकर्षित भएका हुन्। दसैँ सुरु हुनु १५ दिनअघि नै अधिकांश गन्तव्यका सस्तो दरका हवाई टिकटहरू बुक भइसकेका छन्।

नेपालको प्रमुख वायुसेवा कम्पनी बुद्ध एयरका अनुसार पर्वतीय उडानबाहेक ११ वटा गन्तव्यमा भइरहेका दैनिक ७० वटा एकतर्फी उडानका अधिकांश टिकट बिक्री भइसकेका छन्। विशेषगरी पोखरा, विराटनगर, भैरहवा, धनगढी, नेपालगन्ज र भद्रपुर जस्ता प्रमुख गन्तव्यमा असोज २८ देखि कात्तिक ३ गतेसम्म (दसैँका मुख्य दिनहरू) का लागि टिकट पाउन कठिन भइसकेको कम्पनीका प्रवक्ता दीपेन्द्र कर्णले जानकारी दिनुभयो।

त्यस्तै, यती एयरलाइन्सले पनि दसैँका लागि ८० प्रतिशतभन्दा बढी टिकट बिक्री भइसकेको जनाएको छ। प्रवक्ता सुदर्शन बर्तौलाका अनुसार ७ वटा गन्तव्यमा दैनिक ६० हाराहारी दुईतर्फी उडान भरिरहेको यतीमा अब महँगो दरका २० प्रतिशत टिकट मात्र बाँकी छन्। सडकको असजिलो अवस्थाका कारण पोखरा, विराटनगर र भैरहवा रुटमा यात्रुको चाप अत्यधिक छ।

यसैगरी श्री एयरलाइन्सका प्रवक्ता अनिल मानन्धरका अनुसार काठमाडौँबाट सात वटा गन्तव्यमा भइरहेका दैनिक २५ वटा एकतर्फी उडानका करिब ७० प्रतिशत टिकट बुकिङ भइसकेका छन्। काठमाडौँबाट बाहिरिने उडानमा अत्यधिक चाप रहे पनि काठमाडौँ फर्किने उडानहरूमा भने अझै टिकटहरू सहजै उपलब्ध रहेका छन्।

प्रमुख वायुसेवा कम्पनी र टिकट बुकिङको अवस्था