शरद ऋतुमा हिमाल आरोहणका लागि ६९ देशका ६९२ आरोहीद्वारा अनुमति

काठमाडौँ, असोज १७ गते । सन् २०२६ को शरद ऋतुमा हिमाल आरोहणका लागि नेपालसहित ६९ देशका ६९२ जना आरोहीहरूले अनुमति लिएका छन्।

पर्यटन विभागका अनुसार यस याममा २६ वटा हिमाल आरोहण गर्न कुल ७९ वटा समूहका आरोहीहरूले अनुमति लिएका हुन्। अनुमति लिनेमा ५१३ जना पुरुष र १७९ जना महिला आरोही रहेका छन्।

विभागकी शाखा अधिकृत सुधा रेग्मीका अनुसार यस वर्ष मनास्लु, धवलागिरि पहिलो, पुथा हिमचुली, दङ्गा र आमादब्लम हिमाल आरोहणका लागि आरोहीहरूको आकर्षण सबैभन्दा बढी देखिएको छ। देशगत रूपमा हेर्दा चीन, रुस, फ्रान्स, जर्मनी, अमेरिका, बेलायत र जापानलगायत देशबाट सबैभन्दा बढी आरोहीहरू नेपाल आएका छन्।

यस याममा मनास्लु आरोहणका लागि मात्र ५०० जनाले अनुमति लिएका छन् भने धवलागिरि पहिलोका लागि ३६, पुथा हिमचुलीका लागि २०, दङ्गाका लागि १६ र आमादब्लमका लागि १५ जनाले अनुमति पाएका छन्। आरोहण अनुमति बापत सरकारले कुल रु २४ करोड ५६ लाख ३८ हजार ७९३ राजस्व सङ्कलन गरेको छ, जसमध्ये रु २२ करोड ५८ लाखभन्दा बढी मनास्लु हिमालबाट मात्र प्राप्त भएको छ।

यद्यपि, असोज पहिलो साता परेको भारी हिमपात र वर्षाका कारण मौसम प्रतिकूल बनेपछि यस वर्ष मनास्लु आरोहण प्रभावित भएको छ। चुचुरोसम्म बनाइएको बाटो (डोरी, भर्‍याङ र सङ्केत चिह्न) हिउँले पुरिएपछि आधार शिविर पुगेका कतिपय आरोही तथा सहयोगी टोलीहरू फर्किएका छन्।