सेप्टेम्बर महिनामा ८८ हजार २४८ विदेशी पर्यटक नेपाल भित्रिए: सबैभन्दा धेरै भारत र चीनबाट

काठमाडौँ, असोज १५ गते । सन् २०२६ को सेप्टेम्बर महिनामा कुल ८८ हजार २४८ जना विदेशी पर्यटक नेपाल भित्रिएका छन्। नेपाल पर्यटन बोर्डका अनुसार गत वर्षको सेप्टेम्बर महिना (७८,७११ पर्यटक) को तुलनामा यस वर्ष पर्यटक आगमन सङ्ख्यामा उल्लेख्य सुधार आएको छ।

क्षेत्रगत आधारमा सबैभन्दा धेरै पर्यटक दक्षिण एसियाली मुलुकहरूबाट भित्रिएका छन्, जसको सङ्ख्या ३० हजार ८५ रहेको छ। मुलुकगत हिसाबले सबैभन्दा बढी १७ हजार ४२५ जना भारतीय पर्यटक नेपाल आएका छन् भने अन्य एसियाली मुलुकहरूबाट कुल १९ हजार ८८८ पर्यटक भित्रिएका छन्, जसमा चीनबाट ११ हजार २१२ जना रहेका छन्।

पर्यटन बोर्डका अनुसार श्रीलङ्काबाट ७,१०८, बङ्गलादेशबाट ३,९६४, भुटानबाट १,१११ र जापानबाट २,०६६ जना पर्यटक नेपाल आएका छन्। यसैगरी युरोपबाट १५,१४८, अमेरिकी महादेशबाट १०,१०७, ओसियाना क्षेत्रबाट ५,४२२, मध्यपूर्वबाट २,६०६ र अफ्रिकाबाट ४,५६८ जना पर्यटक भित्रिएका छन्।

गत वर्षको तुलनामा यो वर्ष विदेशी पर्यटकको आगमन बढे पनि भदौ १० गते रसुवाको भोटेकोशी नदीमा आएको बाढीका कारण सडक तथा यातायात प्रभावित हुँदा सोचेभन्दा कम पर्यटक भित्रिएको पर्यटन बोर्डले जनाएको छ।