रोजाइमा तेह्रथुमको पर्यटकीय ‘चाङ्गलुङ गुफा’: पूर्वाधार विकासमा चार करोड खर्च

धनकुटा, असोज १५ गते । तेह्रथुमको छथर गाउँपालिका–६, सुदापस्थित पर्यटकीय सम्भावना बोकेको चाङ्गलुङ गुफा पछिल्लो समय आन्तरिक पर्यटकको रोजाइमा पर्दै गएको छ। सडक सञ्जालको विस्तार र आवश्यक पूर्वाधार विकाससँगै यस क्षेत्रमा पर्यटकको चहलपहल बढ्न थालेको हो।

करिब ३८ रोपनी क्षेत्रफलमा फैलिएको यस क्षेत्रमा साना-ठुला गरी एक दर्जनभन्दा बढी गुफाहरू रहेका छन्। लिम्बू भाषामा ‘चाङ्गलुङ’ को अर्थ ढुङ्गामाथि ढुङ्गाको थाक भन्ने हुन्छ। यहाँ करिब १५० मिटरभन्दा लामो प्राकृतिक गुफाका साथै चाङलुङ देवी र मच्छिन्द्र देवी लगायत देवी-देवताको वासस्थान रहेको धार्मिक किंवदन्तीसमेत पाइन्छ।

गुफाको पर्यटन प्रवर्द्धन र पूर्वाधार निर्माणका लागि विक्रम संवत् २०७५ यता तीनै तहका सरकारबाट करिब चार करोड रुपियाँ खर्च भइसकेको छथर गाउँपालिका अध्यक्ष सन्तवीर लिम्बूले जानकारी दिनुभयो। पर्यटकलाई आकर्षित गर्न स्वागतद्वार, चट्टानको टुप्पोमा रिफ्रेसमेन्ट (हावाघर), सिँढी मार्ग, रेलिङ, फलैँचा तथा ‘लभ पार्क’ जस्ता संरचनाहरू निर्माण गरिएका छन्।

धनकुटाको सिधुवा बजारबाट शुक्रबारे हुँदै छथरको मार्सेसम्म १२ किलोमिटर पक्की र ३ किलोमिटर कच्ची सडक पार गरी चाङ्गलुङ गुफा पुग्न सकिन्छ। गुफाभित्र उज्यालोको अभाव र साँघुरा ओढारहरू रहेकाले यात्रा सहज बनाउन दिशा-निर्देशन (Arrow) र थप व्यवस्थापन आवश्यक रहेको स्थानीय तथा पर्यटकहरूको भनाइ छ।