मौसममा सुधार आएपछि मनास्लु क्षेत्रमा पर्यटकको बढ्यो चहलपहल : जोखिमयुक्त पदमार्ग मर्मतमा जुटे स्थानीय

गोरखा, असोज १४ गते । मौसममा सुधार आएपछि उत्तरी गोरखाको प्रसिद्ध मनास्लु पदमार्ग क्षेत्रमा पर्यटकको चहलपहल पुनः बढ्न थालेको छ। गत शुक्रबारदेखि आइतबारसम्म परेको अविरल वर्षाका कारण केही दिन पर्यटक आवागमन प्रभावित भए पनि सोमबारदेखि मौसम खुलेसँगै मनास्लु क्षेत्रमा विदेशी तथा आन्तरिक पर्यटकको आगमन बाक्लिएको हो।

अविरल वर्षा र रसुवा क्षेत्रमा आएको बाढीका कारण यस वर्ष अघिल्ला वर्षहरूको तुलनामा पर्यटकको आवागमन केही घटेको स्थानीय होटल व्यवसायीहरूले बताएका छन्। मौसम खराब भएका कारण असोज ८, ९ र १० गते मनास्लु क्षेत्रमा प्रवेश अनुमति (पर्मिट) जारी गर्न रोकिँदा केही दिन पर्यटक आवागमन शून्यप्रायः बनेको थियो।

मौसम खुलेसँगै चुमनुब्री गाउँपालिकाका बासिन्दाहरू वर्षाले क्षति पुर्‍याएका पदमार्ग तथा बाटो मर्मतमा जुटेका छन्। मनास्लु सर्किट अन्तर्गत स्याला र ल्हो गाउँबिचको पदमार्ग, लिहिर-भर्जम गाउँबिचको बाटो तथा नामरुङस्थित काठेपुल मर्मत गरी आवत-जावत सहज बनाउने काम भइरहेको स्थानीयले जनाएका छन्।

मनास्लु संरक्षण क्षेत्र आयोजना (एमक्याप) का अनुसार मौसममा सुधार आएपछि आइतबारदेखि पुनः प्रवेश अनुमति पत्र जारी गर्न थालिएको छ। यद्यपि, उत्तरी गोरखाका केही स्थानमा सुक्खा पहिरो तथा ढुङ्गा खस्ने जोखिम कायमै रहेकाले पदयात्री, गाइड, पोर्टर तथा पर्यटन व्यवसायीहरूलाई आवश्यक सावधानी र सतर्कता अपनाउन एमक्यापले आग्रह गरेको छ।