भोटेकोशी बाढीपीडितको पुनःस्थापना र पुनःनिर्माण प्रदेश सरकारको पहिलो प्राथमिकता: मुख्यमन्त्री किरण थापा मगर

भक्तपुर, असोज १२ गते । बागमती प्रदेश सरकारका मुख्यमन्त्री किरण थापा मगरले भोटेकोशी बाढीपीडितको पुनःस्थापना र प्रभावित क्षेत्रको पुनःनिर्माणलाई प्रदेश सरकारले पहिलो प्राथमिकतामा राखेको बताउनुभएको छ। भक्तपुर उद्योग वाणिज्य सङ्घद्वारा आयोजित छलफल कार्यक्रममा बोल्दै उहाँले प्रभावित क्षेत्रलाई पुरानै अवस्थामा फर्काउन पूर्वाधार निर्माणलाई जोड दिइने स्पष्ट पार्नुभयो।

मुख्यमन्त्री थापाले सङ्घीय सरकार, प्रदेश सरकार, स्थानीय तह र निजी क्षेत्रबीच एकीकृत समन्वय र सहकार्य गरेर मात्र पुनःस्थापना तथा पुनःनिर्माणको कामलाई द्रुत गतिमा अघि बढाउन सकिने बताउनुभयो। उहाँका अनुसार बागमती प्रदेश सरकारले सुरुवाती चरणमा उद्धार र खाद्यान्नसहितको राहत वितरण गरिसकेको र अहिले दीर्घकालीन पुनःनिर्माणमा जुटिरहेको छ।

राज्य एक्लैको प्रयासले मात्र बाढी प्रभावित क्षेत्रमा सबै काम पूरा गर्न असम्भव हुने भन्दै मुख्यमन्त्री थापाले निजी क्षेत्र तथा विभिन्न सङ्घ-संस्थाहरूसँग निरन्तर छलफल र सहकार्य भइरहेको जानकारी दिनुभयो।

कार्यक्रमको समापनपछि भक्तपुर उद्योग वाणिज्य सङ्घका तर्फबाट जिल्लाको आधुनिक कृषि, दिगो पर्यटन, निर्यातमुखी हस्तकला एवं औद्योगिक विकासका लागि १३ बुँदे माग तथा सुझाव पत्र मुख्यमन्त्री थापालाई हस्तान्तरण गरिएको थियो।