कुलेखानी जलाशय भरिने जोखिम टर्यो: पानीको सतह १,५२७ मिटर पुगे पनि साइरन नबजाइने

मकवानपुर, असोज १२ गते । मुलुककै ठूलो जलाशययुक्त कुलेखानी जलविद्युत् आयोजनाको इन्द्रसरोवरमा पानी संकलन हुने क्रम घट्दै गएपछि जोखिम टरेको छ। जलाशयमा पानीको सतह १ हजार ५ सय २७ मिटर पुगेपछि तल्लो तटीय क्षेत्रका बासिन्दालाई पूर्वसावधानीका लागि साइरन बजाउने तयारी गरिए पनि पानी थपिने क्रम सुस्त भएपछि साइरन नबजाइएको हो।

जलाधार क्षेत्रमा वर्षा कम भएसँगै जलाशयमा पानीको आवक प्रतिघण्टा २ सेन्टिमिटरमा झरेको छ। कुलेखानी प्रथम जलविद्युत् आयोजनाका प्रमुख प्रल्हाद राउतका अनुसार पानी थपिने क्रम निकै सुस्त भएकाले र तटीय क्षेत्रका बासिन्दामा त्रास नफैलोस् भन्नका लागि साइरन नबजाइएको हो।

जलाशय भरिनबाट जोगाउन र पानीको सतह घटाउन नेपाल विद्युत् प्राधिकरणले कुलेखानीका तीनवटै युनिट (कुलेखानी पहिलो, दोस्रो र तेस्रो) २४ सै घण्टा पूर्ण क्षमतामा सञ्चालन गरिरहेको छ। तिनै वटा युनिटबाट कुल १०८ मेगावाट विद्युत् निरन्तर उत्पादन गर्दा दैनिक करिब ४० देखि ५० सेन्टिमिटर पानी खपत भइरहेको छ।

कूल १ हजार ५ सय ३० मिटर भण्डारण क्षमता रहेको कुलेखानी जलाशय पूर्ण रूपमा भरिन अझै २ मिटर ९१ सेन्टिमिटर बाँकी छ। जलाधार क्षेत्रमा वर्षा रोकिएकाले र २४ सै घण्टा विद्युत् उत्पादन जारी रहेकाले तत्काल बाँधको ढोका खोल्नुपर्ने वा तटीय क्षेत्रमा जोखिम हुने अवस्था नरहेको आयोजनाले जनाएको छ।