बाढीले बगाएको क्रुज पिलरमै अड्किए पनि नारायणी पुलमा सबै सवारीसाधनको आवागमन खुला: क्रेनको सहायताले हटाउने प्रयास

नारायणगढ, असोज १२ गते । बाढीले बगाएर ल्याएको ‘राइनो क्रुज‘ जहाज नारायणी पुलको पिलरमा अड्किएपछि सुरक्षाका लागि बन्द गरिएको पुलमा पुनः सवारीसाधनको आवागमन खुला गरिएको छ।

सम्भावित जोखिमलाई ध्यानमा राख्दै रातिको समयमा साना तथा अत्यावश्यक सवारीसाधनलाई मात्र आवतजावत गर्न दिइए पनि अहिले भने अवस्था मूल्याङ्कन गरी सबै प्रकारका सवारी साधन चलाउन दिइएको छ।

इलाका प्रहरी कार्यालय गैँडाकोटका प्रमुख प्रहरी निरीक्षक लक्ष्मण गिरीका अनुसार अवस्था सामान्य बन्दै गएकाले पुलमा साना, ठूला तथा मालवाहक सवारीसाधनहरूलाई वारपार गर्न अनुमति दिइएको हो। यसअघि क्रुजसिपले पुलको पिलरमा कडा धक्का दिएर अड्किएपछि दुर्घटनाको जोखिम बढेकाले पूर्व–पश्चिम राजमार्ग र पुलको आवागमन रोकिएको थियो।

पुलमा यातायात सञ्चालन भए पनि बाढीले बगाएर ल्याएको राइनो क्रुजसिप भने अझै पनि पुलको पिलरमै अड्किएर रहेको छ। नदीमा पानीको सतह र बहाव उच्च रहेकाले क्रुजलाई सुरक्षित रूपमा बाहिर निकाल्न वा हटाउन निकै चुनौती भइरहेको प्रहरीले जनाएको छ।

अहिले बिहानैदेखि क्रेनको सहायताले पानीको बहाव हेरेर क्रुजलाई किनारमा ल्याउने र सम्भव नभए सुरक्षित रूपमा बगाउनेसम्मको प्रयास भइरहेको प्रहरी निरीक्षक गिरीले बताउनुभयो। सुरक्षा निकायहरूले घटनास्थलमा खटिएर अवस्थाको निरन्तर अनुगमन गरिरहेका छन्।