कुलेखानी जलाशयमा पानीको सतह बढ्ने क्रम निरन्तर, ढोका खोलिन सक्ने भन्दै हेटौँडा-काठमाडौँ सडकमा सवारी चलाउन रोक

मकवानपुर, असोज ११ गते । मकवानपुरको इन्द्रसरोवर गाउँपालिकास्थित कुलेखानी जलविद्युत् आयोजनाको जलाशय (इन्द्रसरोवर ताल) मा पानीको सतह निरन्तर बढेपछि जिल्ला प्रशासन कार्यालय, मकवानपुरले विशेष यात्रा सचेतना जारी गरेको छ। जलाधार क्षेत्रमा भइरहेको अविरल वर्षाका कारण ताल भरिने अवस्थामा पुगेकाले जुनसुकै समयमा पनि जलाशयको ढोका खोल्न सकिने चेतावनी दिइएको छ।

प्रशासकीय अधिकृत सन्तोष सुवेदीका अनुसार नेपाल विद्युत् प्राधिकरणले सुरक्षाका मापदण्ड पूरा गरी साइरन बजाएर कुलेखानीको ढोका खोल्न सक्ने भएकाले हेटौँडा-कुलेखानी-काठमाडौँ सडक खण्डमा यात्रा गर्दा विशेष सावधानी अपनाउन आग्रह गरिएको हो। जोखिम न्यूनीकरणका लागि प्रशासनले निश्चित समयका लागि सवारी साधन सञ्चालनमा रोक लगाएको छ।

प्रशासनको सूचना अनुसार आइतबार दिउँसो ४:०० बजेदेखि सोमबार बिहान ५:०० बजेसम्म भैंसे-देउराली-सिस्नेरी-काठमाडौँ र पालुङ-सिस्नेरी-देउराली-हेटौँडा सडक खण्डमा कुनै पनि प्रकारका सवारी साधन सञ्चालन नगर्न/नगराउन निर्देशन दिइएको छ। अत्यावश्यक काम परेका यात्रुहरूलाई वैकल्पिक मार्गका रूपमा त्रिभुवन राजपथ प्रयोग गर्न अनुरोध गरिएको छ।

कुलेखानी जलविद्युत् केन्द्रको बाँध नियन्त्रण कक्षका अनुसार आइतबार दिउँसो २:१७ बजे जलाशयको पानीको सतह १,५२६.५२ मिटर पुगिसकेको छ, जबकि यसको कुल क्षमता १,५३० मिटर रहेको छ। जलविद्युत् केन्द्रका प्रबन्धक प्रल्हाद राउतका अनुसार पानीको सतह १,५२७ मिटर पुग्नेबित्तिकै तटीय क्षेत्र र सडक प्रयोगकर्ताहरूलाई सचेत गराउन पहिलो सुरक्षा साइरन बजाइनेछ।