अन्नपूर्ण संरक्षण क्षेत्रमा पर्यटक परमिट बन्द – एक्यापको सूचना

मुस्ताङ, असोज ११ गते । राष्ट्रिय प्रकृति संरक्षण कोष, अन्नपूर्ण संरक्षण क्षेत्र आयोजना (एक्याप) ले सम्भावित विपद् जोखिमको प्रक्षेपण तथा त्यसबाट हुनसक्ने क्षति न्यूनीकरणका लागि सो क्षेत्रमा जाने पर्यटकहरूका लागि प्रवेशाज्ञा (परमिट) वितरण अस्थायी रूपमा बन्द गरेको छ।

एक्याप प्रधान कार्यालय पोखराको निर्णयअनुसार बिहीबारदेखि मौसममा सुधार नआएसम्मका लागि अनलाइन तथा भौतिक परमिट सेवा रोकिएको हो।

मौसम पूर्वानुमान महाशाखा र राष्ट्रिय जोखिम न्यूनीकरण तथा व्यवस्थापन प्राधिकरणले हिमाली तथा उच्च पहाडी क्षेत्रमा भारी वर्षा र हिमपातको चेतावनी दिएकाले पर्यटकको सुरक्षालाई ध्यानमा राखी यो कदम चालिएको एक्याप जोमसोमका कार्यालय प्रमुख राजेश गुप्तले जानकारी दिनुभयो। वर्षा र हिमपातका कारण बाढी, पहिरो तथा बाटो अवरुद्ध भई यात्रा जोखिमपूर्ण हुन सक्ने आकलन गरिएको छ।

यस निर्णयसँगै मुस्ताङ, मनाङ, लमजुङ, म्याग्दी र कास्कीका माथिल्लो भेगहरूमा जाने पर्यटकका लागि प्रवेशाज्ञा दिन रोक लगाइएको छ। यद्यपि, परमिट बन्द हुनुअघि वा अन्य तरिकाले क्षेत्रभित्र प्रवेश गरिसकेका पर्यटकहरूलाई कार्यालयले भौतिक रूपमा उपस्थित भई आवश्यक सहजीकरण र परमिट शुल्क लिएर व्यवस्थापन गरिरहेको छ।

मौसममा सुधार आउनासाथ साविकबमोजिम नै अनलाइन तथा भौतिक परमिट सेवा पुनः सञ्चालनमा ल्याइने एक्यापले जनाएको छ। अन्नपूर्ण संरक्षण क्षेत्र भ्रमणका लागि सार्क राष्ट्रका पर्यटकलाई रु. १,००० र तेस्रो मुलुकका पर्यटकका लागि रु. ३,००० प्रवेशाज्ञा शुल्क तोकिएको छ।