रोसी खोलाको बाढीले बगाएको बीपी राजमार्ग खुलाउन तीव्र प्रयास: क्षति पुगेका स्थानहरूमा उपकरण परिचालन

बनेपा, असोज १० गते । अविरल वर्षा र रोसी खोलामा आएको भीषण बाढीका कारण बीपी राजमार्गका विभिन्न स्थानमा बनाइएका डाइभर्सन सडकहरू बगेपछि अबरुद्ध बनेको राजमार्ग खुलाउन तीव्र रूपमा काम सुरु गरिएको छ। बाढीले सडक बगाउनुका साथै लेदोसहितको पहिरो खसेपछि काभ्रेपलाञ्चोक र सिन्धुली जोड्ने प्रमुख बीपी राजमार्ग अवरुद्ध भएको हो।

सडक डिभिजन भक्तपुरका अनुसार बाढीका कारण चौकीडाँडा, कटुञ्जे (घुमाउने), माम्ती र पिप्ले क्षेत्रमा गरी कुल १ किलोमिटर ६८५ मिटर सडकमा पहिरो तथा डाइभर्सन वासआउट (बगाएको) भएको छ। डिभिजन प्रमुख सिनियर डिभिजनल इन्जिनियर सुमन योगेशले वर्षा रोकिएसँगै उपकरणहरू परिचालन गरी क्षति भएका स्थानमा डाइभर्सन निर्माण र पुनर्निर्माण भइरहेको भित्री ट्र्याकबाट सवारीसाधन सञ्चालन गर्ने काम अघि बढाइएको जानकारी दिनुभयो।

अहिले घुमाउने क्षेत्रमा तीन वटा उपकरण परिचालन गरी सडक सञ्चालनको प्रयास भइरहेको छ भने चौकीडाँडामा पनि प्राविधिक टोलीले निरीक्षण गरी वैकल्पिक बाटो तयार पारिँदै छ। सडक डिभिजनले मौसम अनुकुल रहेमा शनिबार साँझसम्म जाइका खण्डबाहेकका अन्य स्थानमा सडक सञ्चालनमा ल्याउन सकिने जनाएको छ।

जाइकाको ठेक्का रहेको माम्ती र पिप्ले क्षेत्रमा मात्रै ३८५ मिटर डाइभर्सन सडक बगेकाले उक्त खण्डमा यातायात सुचारु गर्न आइतबारसम्म अर्थात् करिब ४८ घण्टा लाग्ने अनुमान गरिएको छ। सडक डिभिजनले बाढीका कारण सोमबारसम्मका लागि राजमार्ग पुनर्निर्माणको काम रोकेर तत्काल यातायात खुलाउन मात्र ध्यान केन्द्रित गरेको छ।