बीपी राजमार्गको काभ्रे खण्डमा चार दिन राति सवारी आवागमन पूर्ण बन्द

बनेपा, असोज ७ गते। जल तथा मौसम विज्ञान विभागले बिहीबारदेखि आइतबारसम्म देशभर भारी वर्षा हुनसक्ने प्रक्षेपण गरेसँगै सम्भावित विपद् न्यूनीकरणका लागि पूर्वतयारी थालिएको छ। अविरल वर्षाका कारण आउनसक्ने पहिरो तथा बाढीको उच्च जोखिमलाई मध्यनजर गर्दै बीपी राजमार्गको काभ्रे खण्डमा चार दिनका लागि रातिको समयमा सवारी आवागमन पूर्ण रूपमा बन्द गरिने भएको हो।

जिल्ला सुरक्षा समितिको बैठकले साँझ ५ बजेदेखि बिहान ५ बजेसम्म सो खण्डमा सवारी साधन सञ्चालनमा रोक लगाउने निर्णय गरेको छ। वर्षा र बाढीपहिरोको अवस्था मूल्याङ्कन गरी दिउँसोको समयमा पनि सवारी रोक्नुपर्ने परिस्थिति आएमा आवश्यक निर्णय लिने अधिकार जिल्ला प्रहरी कार्यालयलाई दिइएको छ। यस निर्णयलाई प्रभावकारी बनाउन छिमेकी जिल्ला सिन्धुली र भक्तपुरका प्रशासनसँग पनि आवश्यक समन्वय गरिनेछ।

सम्भावित जोखिमबाट बच्न नदी किनार तथा पहिरोको जोखिममा रहेका बस्तीहरूमा पूर्वसूचना प्रणालीलाई निरन्तरता दिने निर्णय गरिएको छ। स्थानीय सञ्चारमाध्यममार्फत सुरक्षा सतर्कतासम्बन्धी सन्देश सम्प्रेषण गर्न नेपाल पत्रकार महासङ्घलाई अनुरोध गरिएको छ। साथै, विपद् आइपरेको खण्डमा तत्काल उद्धार तथा राहतका लागि नेपाली सेना, नेपाल प्रहरी र सशस्त्र प्रहरी बलका टोलीहरूलाई चौबीसै घण्टा तयारी अवस्थामा राखिएको छ।

स्थानीय तहका विपद् व्यवस्थापन समितिसँग निरन्तर समन्वय गर्दै प्रशासनले सम्भावित क्षति न्यूनीकरणका लागि सम्पूर्ण संयन्त्र सक्रिय बनाएको छ। नदी तटीय क्षेत्र तथा भिरालो जमिन आसपासका बासिन्दालाई विशेष सावधानी अपनाउन र अत्यावश्यक कामबाहेक यात्रा नगर्न जिल्ला प्रशासन कार्यालयले विशेष अनुरोध गरेको छ।