“वायुसेवा निगमका जहाज ग्राउन्डेड हुँदा यात्रुलाई सास्ती, पर्यटनमन्त्रीले सदनमा जवाफ दिनुपर्छ”

काठमाडौँ, असोज ६ गते । नेपाल वायुसेवा निगमका जहाजहरूको उडान अनिश्चित बन्दा विदेशमा रहेका नेपाली यात्रुहरूले गम्भीर आर्थिक तथा मानसिक सास्ती बेहोर्नुपरेको प्रमुख प्रतिपक्षी दल नेपाली कांग्रेसका सांसद मदनकृष्ण श्रेष्ठले बताउनुभएको छ।

प्रतिनिधिसभाको बैठकमा बोल्दै सांसद श्रेष्ठले निगमका दुई वाइडबडी जहाज विदेशमा प्राविधिक समस्याका कारण ग्राउन्डेड भएको विषयमा सरकारसँग स्पष्ट जवाफ माग गर्नुभएको छ।

हाल निगमको एउटा वाइडबडी जहाज इटाली र अर्को जापानको नारितामा ग्राउन्डेड अवस्थामा रहेका छन्। सांसद श्रेष्ठका अनुसार वैदेशिक रोजगारी, उपचार तथा महत्त्वपूर्ण कामका लागि महिनौँ अघि टिकट काटेर बसेका नेपालीहरू राष्ट्रिय ध्वजावाहकको उडान अनिश्चित हुँदा मारमा परेका छन्।

उहाँले दुवै जहाजमा देखिएको प्राविधिक समस्या, मर्मतको प्रगति र सेवा पुनः सञ्चालनको स्पष्ट समयतालिकाबारे संस्कृति, पर्यटन तथा नागरिक उड्डयनमन्त्रीले आजै सदनलाई जानकारी गराउनुपर्ने जोडदार माग गर्नुभयो।

साथै, जहाजहरू ग्राउन्डेड हुँदा निगम र देशलाई भएको समग्र आर्थिक क्षतिबारे पनि सरकारले सदनसामु स्पष्ट पार्नुपर्ने उहाँको भनाइ थियो। टिकट काटिसकेका यात्रुहरूलाई आधिकारिक माध्यमबाट नियमित सूचना उपलब्ध गराउन र यात्रा रद्द गर्न चाहने यात्रुहरूका लागि सहज रूपमा रकम फिर्ता (रिफन्ड) गर्ने व्यवस्था मिलाउन उहाँले सरकारलाई सुझाव दिनुभयो।

प्रतिनिधिसभा बैठकमा सांसद श्रेष्ठले मर्मत सम्झौता तथा व्यवस्थापकीय प्रक्रिया कुन चरणमा पुगेको छ भन्नेबारे पारदर्शी रूपमा विवरण सार्वजनिक गर्न माग गर्दै राष्ट्रिय ध्वजावाहकको गैर-जिम्मेवारपनले अन्तर्राष्ट्रिय स्तरमै देशको साख खस्किएको टिप्पणी गर्नुभयो।