‘प्रथम टुर दि लमजुङ–२०२६’ साइकल यात्रा सम्पन्न: साहसिक र दिगो पर्यटन प्रवर्द्धनमा जोड

लमजुङ, असोज ४ गते । लमजुङको प्राकृतिक सौन्दर्य, सांस्कृतिक सम्पदा तथा पर्यटकीय गन्तव्यको राष्ट्रियस्तरमा प्रवर्द्धन गर्ने उद्देश्यका साथ ‘प्रथम टुर दि लमजुङ–२०२६’ साइकल यात्रा सफलतापूर्वक सम्पन्न भएको छ।

लमजुङ साइक्लिङ संघको आयोजनामा शनिबार र आइतबार दुई दिनसम्म सञ्चालन भएको उक्त यात्रामा ४२ जिल्लाका करिब ५०० जना साइक्लिष्टहरू सहभागी भएका थिए।

४० किलोमिटर दूरीको यो साइकल यात्रा पहिलो दिन बेँसीशहरबाट सुरु भई कपुरगाउँ हुँदै प्रसिद्ध पर्यटकीय घलेगाउँ पुगेको थियो भने दोस्रो दिन घलेगाउँबाट घनपोखरा, भुलभुले हुँदै हमखोला झरनामा पुगेर समापन भएको थियो। यात्रामा १५ वर्षीया बालिकादेखि काठमाडौँका ६५ वर्षीय ज्येष्ठ नागरिक यादव ढकालसम्मको उत्साहजनक सहभागिता रहेको थियो।

संघका अध्यक्ष ध्रुवराम प्रधान र सचिव रविन श्रेष्ठका अनुसार कार्यक्रमको मुख्य उद्देश्य लमजुङलाई साहसिक पर्यटनको नयाँ गन्तव्यका रूपमा चिनाउनु, स्वस्थ जीवनशैली र वातावरणमैत्री यातायातको सन्देश दिनु तथा स्थानीय कला-संस्कृति र होमस्टे व्यवसायको प्रवर्द्धन गर्नु रहेको थियो। स्थानीय जनप्रतिनिधिहरूले पनि यस्ता कार्यक्रमले ग्रामीण अर्थतन्त्रलाई चलायमान बनाउन सहयोग पुर्‍याउने बताएका छन्।

नेपाल पर्यटन बोर्ड, गण्डकी प्रदेश सरकार र स्थानीय पालिकाहरूको सहयोगमा सम्पन्न यस कार्यक्रमलाई आगामी वर्षहरूमा अझ बृहत् राष्ट्रिय तथा अन्तर्राष्ट्रिय साइकल महोत्सवका रूपमा विकास गर्ने लक्ष्य आयोजकले राखेको छ।